ވިލިފުށި ދާއިރާގެ ކުރީގެ މަޖިލިސް މެންބަރު ރިޔާޒް ރަޝީދުގެ އަނބިކަނބަލުން ނާޒްލީ 62، އަވަހާރަވީ ސިއްހީ ކުއްލި މައްސަލައެއްގައި އޭޑީކޭގައި ފަރުވާ ދެމުން ދަނިކޮށެވެ.
ނާޒްލީއަކީ ނަރުހެއްގެ ގޮތުގައި ގިނަ ދުވަސްތަކެއް ވަންދެން ހިދުމަތް ކުރެއްވި ބޭކަނބަލެކެވެ. އަދި އޭނާ އަކީ ކާބޯތަކެތި ތައްޔާރު ކުރުމުގައިވެސް ވަރަށް މަޝްހޫރު ބޭކަނބަލެކެވެ.
ނާޒްލީ ވަނީ ތެލެސީމިއާ ސެންޓަރުގައި ނަރުހެއްގެ ގޮތުގައި ވަރަށް ދިގު މުއްދަތަކަށް ހިދުމަތްކުރައްވައިފަ އެވެ. އެއާއެކު އޭނާ ފާހަގަވަނީ ތެލެސީމިއާ ކުދިންނާއި، މީހުންގެ ލޯބި ހާސިލްކުރައްވައިފައިވާ ބޭކަނބަލެއްގެ ގޮތުގައެވެ.
ނާޒްލީ ނިޔާވުމާ ގުޅިގެން ތެލެސީމިއާ ސެންޓަރުން ކުރި ޕޯސްޓެއްގައި ވަނީ އޭނާގެ ހިދުމަތްތަކަށް ޝުކުރު އަދައިކޮށްފަ އެވެ.
ކާބޯތަކެތި ތައްޔާރު ކުރުމުގައި ވެސް ނާޒްލީ ވަނީ ވަރަށް ބޮޑު މަޝްހޫރު ކަމަކާ އާންމުންގެ އިތުބާރު ހޯއްދަވާފަ އެވެ. ކޭކު އެޅުމާއި ހަވާދު ހެދުމާއި ހެދިކާ ތައްޔާރުކޮށް ވިއްކެވި އެވެ.
މީގެ އިތުރުން ނާޒްލީއަކީ ކޭކު އެޅުމަށް ވެސް މޮޅު ކަނބަލެކެވެ. ނާޒްލީ ވަނީ ކޭކު ކޯސްތަކާއި އެކިއެކި ކާބޯތަކެތި ތައްޔާރު ކުރުމުގެ ތަފާތު ކޯސްތައް ހިންގަވައިފަ އެވެ. އެހެންކަމުން ނާޒްލީ ފާހަގަކޮށްލެވެނީ ހިދުމަތްތެރި ބޭކަނބަލެއްގެ ގޮތުގައެވެ.
އޭނާގެ މަރާ އެކު ސޯޝަލް މީޑިއާގައި އެތައް ބަޔަކު ގެންދަނީ ހިތާމަފާޅުކޮށް އާއިލާއަށް ތައުޒިޔާ ކިޔަމުންނެވެ. އޭނާގެ ބައެއް ހިދުމަތްތަކާ ގުޅޭ ގޮތުން ވެސް ބައެއް މީހުންގެ ތައުރީފާއި ހެޔޮ ބަސްތައް ގިނަ އެވެ.
ނާޒްލީގެ ޖަނާޒާ އޮންނާނީ މާދަމާ ހެނދުނު 09:00 އިން ފެށިގެން އާސަހަރާގަ އެވެ. ކަށުނަމާދުކުރުން އޮންނާނީ މާދަމާ ހަވީރު އަސުރު ނަމާދަށްފަހުގަައި، އާސަހަރާގަ އެވެ.
