އެފްއެސްއެމްގެ ތެޔޮ ބޯޓު ނިލަންދޫ ފަރަށް އެރީ މިދިޔަ އާދިއްތަ ދުވަހުގެ ހެނދުނު އެވެ. އަދި އެދުވަހު މެންދުރު ފަހު ބޯޓު ފުންކުރުމުގެ މަސައްކަތްވެސް ވަނީ ކުރިއަށް ގެންގޮސްފަ އެވެ.
"ސީއެންއެމް" އަށް މައުލޫމާތު ދެއްވަމުން ކައުންސިލް ރައީސް ނާސިހް ވިދާޅުވީ ބޯޓު މިހާރު ފުންކުރެވިފައިވާ ކަމަށާއި ހަމަ އެދުވަހުގެ އިރުއޮށްސުން ވަގުތު ގާތްގަނޑަކަށް 5:30 އަދި 6:00 ކާ ދޭތެރޭ ފުންކުރެވިފައިވާކަމަށެވެ.
އަދި އެފްއެސްއެމް އިން ބޯޓު އަނބުރާ ގެންގޮޮސްފައިވާކަމަށްވެސް ނާސިހް ވިދާޅުވި އެވެ.
ބޯޓުފުންކުރެވިފައިވީ ނަަމަވެސް ނިލަންދޫ ފަރަށް ބޮޑު ގެއްލުމެއް ވެފައިވާކަން އޭނާ ފާހަގަކުރެއްވި އެވެ.
މިވަގުތު އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އަށް ކައުންސިލުން ގުޅައިގެން ވާހަކަ ދައްކަމުން ދާކަަމަށާއި މިއަދު ނޫނި މާދަމާގެ ވަގުތެއްގައި ފަރުގެ މައްސަލައިގައި ރަސްމީ ލިޔެކިޔުންތައް ބަދަލުކުރެވި ކުރިއަށްދާނެ ގޮތެއް ކަނޑައަޅާނެކަމަށްވެސް ނާސިހް ވިދާޅުވި އެވެ.
ބޯޓުތައް ފަރަށް އަރައިގެން ލިބޭ ގެއްލުންތަކުގައި ބޮޑެތި އަދަދުތަކުން އެ އުޅަނދުތައް އީޕީއޭ އިން ޖޫރިމަނާ ކުރެ އެވެ.
