ޓޮޓެންހަމް އިން ވަނީ ފޯވާޑް ސޮންގެ ކޮންޓްރެކްޓް އިތުރު ކުރަން ނިންމީ، ކޮންޓްރެކްޓް ހަމަވުމުގެ ކުރިން، އެއް އަހަރަށް އިތުރު ކުރުމަށް އޮންނަ އިހްތިޔާރީ މާއްދާގެ ދަށުންނެވެ. މިހާރު ސޮންގެ ކޮންޓްރެކްޓް ނިމޭނީ 2026 ވަނަ އަހަރުގެ ސީޒަންގެ ނިޔަލަށެވެ.
އުމުރުން 32 އަހަރުގެ ސޮން، ސްޕާސްއާ ގުޅިނީ ބަޔާން ލެވަކޫސަން އިން 2015 ވަނަ އަހަރުއެވެ. ސޮންވަނީ ސްޕާސްއާއެކު ހޭދަކުރި 10 އަހަރުގެ ތެރޭގައި އެ ކްލަބަށް ކުޅުނު 431 މެޗުގައި 169 ގޯލް ކާމިޔާބުކޮށްދީފައެވެ. ދެކުނު ކޮރެއާގެ ގައުމީ ޓީމުގެ ކުޅުންތެރިޔާ ވަނީ ޕްރިމިއާ ލީގުގައި ކުޅުނު 320 މެޗުގައި 125 ގޯލާއި 68 އެސިސްޓް ހަދާފައެވެ.
ސޮންގެ ކޮންޓްރެކްޓް އެކްސްޓެންޝަނެއް ހަދައި އެއް އަހަރަށް އެއްބަސްވުން އިތުރު ކުރިއިރު، އެ ކްލަބުގެ އަމާޒަކީ ޓޮޓެންހަމްއާއެކު ސޮން އަށް ތަށްޓެއް ކާމިޔާބު ކުރެވުމެވެ. 2019 ވަނަ އަހަރު ޗެމްޕިއަންސް ލީގުގެ ފައިނަލްގައި ސްޕާސްއާއެކު ސޮން ކުޅުނެވެ. އެކަމަކު ލިވަޕޫލް އަތުން އެ ފައިނަލުން ބަލިވީއެވެ.
މި ސީޒަނުގެ ޕްރިމިއާ ލީގުގެ 12 ވަނައިގައި ސްޕާސް އޮތްއިރު، ސޮން ވަނީ ގަދަ 17 މެޗުގައި ފަސް ގޯލް ޖަހައި ހަ އެސިސްޓް ރެޖިސްޓްރީކޮށްފަ އެވެ.
