ދެކުނުގެ އަތޮޅުތަކަށް ކުރައްވާ ދަތުރުފުޅުގައި، ގއ. އަތޮޅުގެ ފުރަތަމަ ރަށް، ކަނޑުހުޅުދޫގައި ބޭއްވި ޖަލްސާގައި ރައީސް ވިދާޅުވީ އެރަށުގައި ބަނދަރުގެ ޖާގައިގެ ދަތިކަން އެބައޮތް ކަމަށެވެ. އަދި އެކަމުގައި ކައުންސިލާއި ސަރުކާރާ ދެމެދު މަޝްވަރާކޮށް، ކައުންސިލުން ބޭނުންވާ ގޮތަށް ބަނދަރު ބޮޑުކުރަން މަސައްކަތް ކުރާނެ ކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވީ ކަނޑުހުޅުދޫ ރައްޔިތުންނަށް މިހާރު ކުރިމަތިވެފައި އޮތް އެންމެ ބޮޑު މައްސަލައަކީ އެ ރަށުގެ ބަނދަރުގެ ޖާގައިގެ ދަތިކަމުގެ މައްސަލަ ކަމަށާއި އެ މަސައްކަތް ބަޖެޓުގެ ތެރެއިން މި އަހަރު ކުރިއަށްގެންދަން ހަމަޖެހިފައިވާ ކަމަށެވެ.
ކަނޑުހުޅުދޫ ސިއްހީ މަރުކަޒު 24 ގަޑިއިރު ހިދުމަތް ދޭ ތަނަކަށް ބަދަލުކުރުމާއެކު، އެ ރަށު ސްކޫލަށް ދިމާވެފައިވާ ޖާގައިގެ ދަތިކަން ވެސް ހައްލުކޮށްދެއްވާނެ ކަމަށް ރައީސް ވިދާޅުވި އެވެ. އަދި ރަށުގެ ފުޓުބޯޅު ސްޓޭޑިއަމް ރަނގަޅު ފެންވަރަށް ތަރައްގީކޮށް ޒުވާނުންނަށް އެތުލެޓިކްސް ތަމްރީނުތައް އެތަނުގައި ކުރިއަށްގެންދެވޭނެ އިންތިޒާމު ހަމަޖައްސަވާނެ ކަމަށްވެސް ވިދާޅުވި އެވެ.
މީގެއިތުރުން ފުޓްސަލް ދަނޑުގައި ފެންސް ޖެހުމާއި ރޮސްޓްރަމް ޖާގަ އިތުރުކޮށްދެއްވާނެ ކަމަށް ރައީސް ވިދާޅުވި އެވެ. އެމަނިކުފާނު ފާހަގަކުރެއްވި ގޮތުގައި މިހާރު އަތޮޅުތަކަށް ކުރައްވާ ދަތުރުފުޅުތަކަކީ ރަށްރަށުގެ ރައްޔިތުންނާ ބައްދަލުކުރައްވައި އެ ރަށްރަށުގެ ރައްޔިތުންގެ އަޑުއައްސަވައި އެ ރައްޔިތުންނަށް ބޮޑުވެފައި ހުރި ކަންކަން ބައްލަވައި އެކަންކަމަށް ހައްލު ހޯއްދަވައިދެއްވުމެވެ.
