ސީ އެންޑް ޑީ ޝިއަމެން މެރަތަންއަކީ، ޗައިނާގެ ފުޖިއަން ޕްރޮވިންސްގެ ކޯސްޓަލް ސިޓީއެއްކަމުގައިވާ ޝިއަމެންގައި އޮންނަ މަޝްހޫރު، ބައިނަލް އަގްވާމީ މެރެތަންއެކެވެ. 2003 ވަނަ އަހަރުން ފެށިގެން އޮންނަ މި މެރަތަންގައި އެވްރެޖްކޮށް ކޮންމެ އަހަރަކުވެސް ބައިލައްކައެއްހާ މީހުން ދުވެއެވެ. 2021 ވަނަ އަހަރުން ފެށިގެން ވޯލްޑް އެތްލެޓިކްސް އެލީޓް ޕްލެޓިނަމް ލަގަބު މި ރޭހަށް ލިބިފައިވާއިރު، މިރޭހުގެ އެންމެ މަޝްހޫރު ކަމަކީ މުޅި ރޭސްވެސް އާދަޔާ ހިލާފު ހިތްގައިމު ކޯސްޓަލް ސަރަހައްދެއްގައި އޮންނަ އޮތުމެވެ.
މިނިސްޓަރު ރާފިއުއަށް މި މެރަތަންގެ ދައުވަތު ލިބިވަޑައިގެންނެވީ މިދިޔަ އަހަރުގެ ލާމު އަތޮޅުގައި ކުރިއަށް ގެންދިޔަ ޝިއަމެން ލާމު މެރަތަންގެ ތެރެއިންނެވެ. ސީ އެންޑް ޑީ ޝިއަމެން މެރަތަން 2025 ގައި ހާއްސަ މެހެމާނެއްގެ ގޮތުގައި ބައިވެރިވެވަޑައިގެންނެވި ސްޕޯޓްސް މިނިސްޓަރު ރާފިއުވަނީ މެރަތަން ފެށުމުގެ ގޮތުން ބޭއްވި ގަންފަޔާ ސެރަމަނީގައި ވެސް ބައިވެރިވެވަޑައިގެންފައެވެ. މިނިސްޓަރު ވަނީ ޝިއަމެން މެރަތަންގައި 5 ކިލޯ މީޓަރުގެ ދުވުން ފުރިހަމަ ކުރައްވާފަ އެވެ.
މިރޭހުގައި ބައިވެރިވެވަޑައިގެންނެވުމަށް ޗައިނާއަށް ކުރައްވަމުން ގެންދަވާ ދަތުރުގައި ވަޒީރުވަނީ ރާއްޖޭގެ ކުޅިވަރު ކުރިއެރުވުމުގެ ގޮތުން ޗައިނާގެ ޝިއަމެން ސިޓީއާ ގުޅުން ބަދަހިކުރުމަށް މަޝްވަރާ ކުރައްވާފައިވާ ކަމަށް ޗައިނާގެ ޒިންހުއާ ގްލޯބަލް ސާވިސްއަށް ދެއްވި އިންޓަވިއުއެއްގައި ވިދާޅުވެފައެވެ. ޝިއަމެން އަކީ ޓެކްނޮލޮޖީ އާއި ކުޅިވަރުގެ ދާއިރާއިން ވަރަށް ކުރިއަރާފައިވާ ސަރަހައްދެއްކަން ފާހަގަ ކުރައްވައި ރާފިއު ވިދާޅުވީ، ރާއްޖެއަށް ކުޅިވަރު ކުރިއެރުވުމުގައި ޝިއަމެންގެ އެހީ ހޯދޭނެ ގޮތްތަކާ ގުޅޭ ގޮތުންނާއި، އެތުލީޓް އެކްސްޗޭންޖް ޕްރޮގްރާމެއް ފެށުމަށް މަޝްވަރާކޮށްފައިވާ ކަމަށެވެ.
