އޭނާއަށް ނިއުދިއްލީން މަރުހަބާ ދެންނެވީ އިންޑިއާގެ ޑިފެންސް މިނިސްޓަރު ރަޖްނަތު ސިންގެވެ.
ދެ ބޭފުޅުން މިއަދު ވަނީ މަޝްވަރާ ބައްދަލުވުމެއް ބާއްވައިފަ އެވެ. އެ ބައްދަލުވުމުގައި ދެ ގައުމުގެ ދިފާއީ ގުޅުން އިތުރަށް ހަރުދަނާކޮށް، ގުޅުން ބަދަހިކުރުމާ ގުޅޭ ގޮތުން ފުޅާ ދާއިރާއެއްގައި މަޝްވަރާކޮށްފައިވާ ކަމަށް އިންޑިއާގެ ނޫސްތަކުގައި ވަނީ ރިޕޯޓުކޮށްފަ އެވެ.
މި ދަތުރުގެ ތެރެއިން އެމްއެންޑީއެފް އިތުރަށް ހަރުދަނާކުރަން ބޭނުންވާ އާލަތްތައް ފޯރުކޮށްދޭން ވެސް ވަނީ ހަމަޖެހިފަ އެވެ.
އަދި އިންޑިޔާއާއި ރާއްޖެއަކީ އިންޑިޔާ ކަނޑުގެ ސަރަހައްދުގެ ސަލާމަތާއި ރައްކާތެރިކަން ދެމެހެއްޓުމުގައި މުހިއްމު ދައުރެއް އަދާކުރާ ދެ ގައުމުކަން ފާހަގަކޮށް، މި ސަރަހައްދުގެ ތަރައްގީއާއި ސަލާމަތާމެދު އިންޑިޔާއިން ގެންގުޅޭ ތަސައްވުރަށް ރާއްޖެއިން ވަރަށް ބޮޑަށް ހިއްސާވާކަން ފާހަގަކޮށްފައިވެ އެވެ.
ޣައްސާން އިންޑިއާއަށް ރަސްމީ ދަތުރެއް މިހާރު ކުރައްވަމުން ގެންދަވާއިރު، އޭނާއަކީ އިދިކޮޅު ޕާޓީއެއްގެ ގޮތުގައި ޕީޕީއެމް އާއި ޕީއެންސީ އޮތްއިރު އެ ދެ ޕާޓީން ހިންގި އިންޑިއާ އައުޓް ހަރަކާތުގެ އެންމެ އިސް އެއް ބޭފުޅާ އެވެ.
ޑިފެންސް މިނިސްޓަރު ޣައްސާން މައުމޫންގެ މި ދަތުރުފުޅަކީ މަގާމާއި ހަވާލުވުމަށް ފަހު އިންޑިޔާއަށް ކުރައްވާ ފުރަތަމަ ރަސްމީ ދަތުރުފުޅެވެ.
މިދިޔަ ހަފުތާގައި ފޮރިން މިނިސްޓަރު އަބްދުﷲ ހަލީލް ވެސް ވަނީ ރަސްމީ ދަތުރުފުޅެއްގައި އިންޑިއާއަށް ވަޑައިގެންފަ އެވެ. އެ ދަތުރުފުޅުގައި ހަލީލް ވެސް ވަނީ އިންޑިއާއަށް ތައުރީފުކުރައްވައި، ރާއްޖެއިން ކުރިއަށްދާން ބޭނުންވަނީ އިންޑިއާއާ އެކުގައި ކަމަށް ވިދާޅުވެފަ އެވެ.
