މިފަހުން ބައެއް ފަރާތްތަކަށް ނޭނގި ވެރިކަން ކުރާ ޕީއެންސީއަށް ރެޖިސްޓްރީ ކޮށްފައިވާ މައްސަލަ ފެންމަތިވެފައިވާއިރު، ގިނަ ބަޔަކު ދަނީ އީސީން ސިޔާސީ ޕާޓީތަކުން ހުށަހަޅާ ފޯމް އެޕްރޫވް ކުރުމުގައި އަމަލުކޮށްފައިވާ އުސޫލާއިމެދު ސުވާލު އުފައްދަމުންނެވެ.
ޕީއެންސީއަށް ވަގަށް މެންބަރުން އިތުރުކުރާ ކަމަށް ބުނެ މިފަހުން މައްސަލަތަކެއް ފެންމަތިވެފައިވާއިރު އެމްޑީޕީ އުފެއްދީންސުރެ އެ ޕާޓީގައި އިސްކޮށް މަސައްކަތް ކުރައްވަމުން އަންނަ, ރައްޔިތުންގެ މަޖިލީހުގެ މަނަދޫ ދާއިރާގެ ކުރީގެ މެންބަރު މުހައްމަދު ތޯރިގު, އޮޅުވާލައިގެން ސަރުކާރު ހިންގާ ޕީއެންސީއަށް ވައްދާފައިވާ ކަމަށް ވިދާޅުވެ, އެ މައްސަލަ އޭނާ ވަނީ ފުލުހަށް ވެސް ހުށަހަޅައިފައެވެ.
ޕީއެންސީން އެއް އަހަރު ތެރޭ އެހާ ގިނަ އަދަދަކަށް މެންބަރުން އިތުރުކޮށްފައިވާއިރު، މިދިޔަ އަހަރު ރައީސް ވެރިކަމަށް ވަޑައިގެންނެވިއިރު އެ ޕާޓީގައި ތިބީ ގާތްގަނޑަކަށް 3،000 މެންބަރުންނެވެ.
މިކަމާ ގުޅިގެން އީސީގެ މެންބަރު ހަސަން ޒަކަރިއްޔާ ބައެއް މީޑިއާތަކަޑް މިއަދި ވިދާޅުވީ އީފާސް މެދުވެރިކޮށް ޕާޓީތަކަށް މީހުން ވައްދާ ގޮތަށް އުސޫލު ބަދަލު ކުރުމަކީ ހައްލަކަށް ވާނެ ކަމަށެވެ. އޭނަ ވިދާޅުވީ މެންބަޝިޕް ފޯމުތަކަށް އެތައް ފީޗާއެއް އިތުރުކުރި ނަމަވެސް ވަގު ފޯމް ހުށަހެޅުން ނުހުއްޓޭ ކަމަށެވެ.
އެހެންވެ ކުރިއަށް އޮތް ދެ މަސް ދުވަހުގެ ތެރޭގައި އީފާސް މެދުވެރިކޮށް ޕާޓީއަށް ވައްދާ ގޮތަށް އުސޫލުތަކާއި ގަވާއިދުތަކަށް ގެންނަން ޖެހޭ ބަދަލުތައް ގެނައުމުގެ މަސައްކަތް ކުރަމުން އަންނަ ކަމަށް ވިދާޅުވި އެވެ.
