ދުނިޔޭގެ ފުޓްބޯޅައިގެ ގަދަ ބާރެއް ކަމަށްވާ ބާސެލޯނާގެ ޓޯވޯ އެކަޑަމީންވެސް ތަމްރީން ހަދާފައިވާ އަދި ރާއްޖޭގެ މިހާރު އެންމެ ފާހަގަކޮށްލެވޭ، އަދި އެންމެ މަތީ ފެންވަރުގައި ގުނޭ ކޯޗުންގެ ތެރޭގައި ހިމެނޭ ސޮބާ ބުނީ، ފުޓްބޯޅަ ދެން ރާއްޖޭގައި ކުރިއަށްދާނީ ބަދަލެއް ގެނެސްގެންކަން ޔަގީން ކަމަށެވެ. ފުޓްބޯޅައިގެ ފޯރި އަތޮޅުތެރޭ އޮތްކަން ފާހަގަކޮށް، ސޮބާވަނީ އަތޮޅު ތެރޭގައި ރަނގަޅު ފެންވަރުގެ ގިނަ ދަނޑުތަކެއްވެސް އޮތްކަން ފާހަގަކޮށްފައެވެ.
ސޮބާއަކީ ނިމިގެންދިޔަ ގޯލްޑްކަޕް ފުޓްބޯޅަ މުބާރާތުން އެންމެ ފާހަގަ ކުރެވުނު އެއް ޓީމުކަމަށްވާ ފުވައްމުލަކު ޓީމު ކޯޗެވެ. ސޮބާއާއެކު ފުވައްމުލަކުވަނީ ސެމީއަށް ދަތުރުކޮށްފައެވެ.
ދިވެހި ފުޓްބޯޅަ ދެން ކުރިއަށްދާނީ ބަދަލެއް ގެނެސްގެން ކަމަށް ތަޖުރިބާކާރު ކޯޗު ސޮބާ ބުނިއިރު، މުޅި ރާއްޖެ ތަމްސީލްވާ ގޮތައް ހޯމް އެންޑް އަވޭ އުސޫލުން ގައުމީ ލީގެއް ފެށުމުގެ މުހިއްމުކަމުގެ އަޑުތައްވެސް މިފަހުންވަނީ ގަދަވެފައެވެ.
މި އަޑުތައް ގަދަވާން ފެށީ ނިމިދިޔަ އަހަރު އޮތް ފޯރިގަދަ ގޯލްޑްކަޕާއެކުއެވެ. އަމިއްލަ ފަރާތެއް ކަމަށްވާ ނައިންޓީ ޕްލަސްއިން ކާމިޔާބު ކަމާއެކު 17 ޓީމާއެކު ބޮޑު ފުޓްބޯޅަ މުބާރާތެއް ކުރިއަށް ގެންދިޔުމުން އެނގިގެން ދިޔައީ ގައުމީ ލީގު ޕްރައިވެޓައިޒް ކުރުމަށް ފަހު ލީގު ހިންގުމުގެ ހުރިހާ ރައިޓްސްއެއް ހިންގާ ފަރާތްތަށް ދިނުން ފަދަ ބަދަލަކަށް އެފްއޭއެމުން ދާން ޖެހޭ ކަމެވެ.
އެފްއޭއެމްގެ ހިންގުމުގައި ހުރިހާ ޒޯނެއް ނުވަތަ ސަރަހައްދެއް ބައިވެރި ކުރެވޭނެ ނިޒާމެއް އުފަން ކުރުވުމުގެ މުހިއްމު ކަމުގެ އަޑު މިހާރުވަނީ ގަދަވެފައެވެ.
