ދުބާއީގައި އެމެރިކާގެ ނޫހަކަށް ދިން އިންޓަވިޔުއެއްގައި ނޭމާ ބުނީ 2026 ވަނަ އަހަރުގެ ވޯލްޑް ކަޕް ވެގެންދާނީ އޭނާގެ އެންމެ ފަހުގެ ވޯލްޑް ކަޕަށް ކަމަށާއި އެ މުބާރާތަށް ބްރެޒިލް ކޮލިފައިވެ، އަދި މުބާރާތް ކާމިޔާބު ކުރަންވެސް ބުރަ މަސައްކަތްތަކެއް ކުރަން ޖެހޭ ކަމަށެވެ.
"އަހަންނަށް އެނގޭ މިއީ އަހަރެންގެ އެންމެ ފަހު ވޯލްޑް ކަޕް، އަހަރެންގެ އެންމެ ފަހު ޝޮޓް، އަހަރެންގެ އެންމެ ފަހު ފުރުސަތުކަން އަދި އަހަރެންނަށް ކުރެވެން ހުރި ހުރިހާ މަސައްކަތެއް ކުރާނަން،" ބްރެޒިލް އަށް އަހަރަކަށް ވުރެ ގިނަ ދުވަހު ކުޅެފައިވާ އުމުރުން 32 އަހަރުގެ ފޯވާޑު ބުންނެވެ.
ވޯލްޑް ކަޕް ކާމިޔާބު ކުރުމުގެ ވާހަކަ ނޭމާ ދައްކާއިރު، ވޯލްޑް ކަޕް ކޮލިފައިންގައި ވެސްބްރެޒިލަށް ވަނީ އުނދަގޫތަކެއް ކުރިމަތިވެފަ އެވެ. 18 ބުރުގެ ތެރެއިން 12 ބުރު ކުޅުނުއިރު، ބްރެޒިލް އޮތީ 10 ގައުމު ހިމެނޭ ގްރޫޕުގެ ފަސްވަނައިގައެވެ. އެކަމަކު ގަދަ ހަޔަކަށް ވޯލްޑް ކަޕްގެ ޖާގަ ކަށަވަރުވާތީ ގްރޫޕުގެ ހަތްވަނައިގަ އޮތް ބޮލީވިއާއަށް ވުރެ ފަސް ޕޮއިންޓް އިތުރަށް ބްރެޒިލްއަށް ލިބައިފައި އެބައޮތެވެ.
ކޮލިފައިންގައި ބްރެޒިލްގެ ފުރަތަމަ ހަތަރު މެޗުގައި ނޭމާ ކުޅުނު ނަމަވެސް 2023 ވަނަ އަހަރުގެ އޮކްޓޯބަރު މަހު އުރުގުއޭ ދެކޮޅާށް ކުޅުނު މެޗުގައި ލިބުނު އަނިޔާއަށް ފަހު ނޭމާއަށް އަދި ބްރެޒިލް ޓީމަކުން ޖާގައެއް ނުލިބެއެވެ. ކަކުލުގެ އޮޕަރޭޝަނަށް ފަހު އޭނާ ހުރީ އަހަރެއްހާ ދުވަހު ބޭރުގަ އެވެ.
އެމެރިކާ، ކެނެޑާ އަދި މެކްސިކޯގައި މުބާރާތް ވޯލްޑްކަޕް މުބާރާތް ފަށާއިރު ނޭމާއަށް އުމުރުން 34 އަހަރުވާނެއެވެ.
