ފަޔާޒު މިހެން ވިދާޅުވީ ސީއެންއެމް އިން ގެނެސްދޭ "ނޭޝަން ޓޯކް" ޕޮޓްކާސްޓް ގައި ވާހަކަ ދައްކަވަމުންނެވެ.
"ސީއެންއެމް" އިން އަންނަނީ ދައުލަތް ނުވަތަ ސަރުކާރު ހިންގުމަށް މިހާރުއޮތް އޮނިގަނޑު ބަދަލުކޮށް، ބޮޑުންގެ ގޭދޮށުގައި މުގޯލި އަޅަން ނުޖެހި ދިރިއުޅެވޭނެކަން ކަށަވަރުވާ ފަދަ ހިންގުމުގެ އާ އޮނިގަނޑެއް ހޯދުމަށް ރައްޔިތުން ހޭލުންތެރި ކުރުމަށް މަސައްކަތްތަކެއް ކުރަމުން ނެވެ.
"ނޭޝަން ޓޯކް"ގެ 12 ވަނަ ޕްރޮގްރާމްގައި ވާހަކަ ދައްކަވަމުން ފަޔާޒު ވިދާޅުވީ ގާނޫނު އަސާސީ އަކީ ގައުމެއް އެ މައްޗަށް އާރަސްތު ވެފަ އޮންނަ އަސާސެއް ކަމަށާއި ދިވެހިރާއްޖޭގެ މިއަދު އަމަލުކުރާ ގާނޫނު އަސާސީ އަކީ ވަރަށް ތަފުސީލްކޮށް ވަރަށް ސާފުކޮށް އޮތް ގާނޫނު އަސާސީއެއް ކަމަށެވެ.
ފަޔާޒު ވިދާޅުވީ 16 އަހަރު ކުރިން ފާސްކުރި ދިވެހިރާއްޖޭގެ ގާނޫނު އަސާސީ އަށް ބަލާލާއިރު ގައުމެއް ސިޔާސީ ގޮތުން ހިންގުމަށްޓަކައި، ގައުމެއް އިގްތިސާދީ ގޮތުން ހިންގުމަށްޓަކައި، ގައުމެއް އިޖްތިމާއީ ގޮތުން ހިންގުމަށްޓަކައި ބޭނުންވާ ހުރިހާ ކަމެއް ހިމަނައިގެން ތައްޔާރު ކުރި ގާނޫނު އަސާސީއެއް ކަމަށާއި މި ގާނޫނު އަސާސީ އަށް ބަލާލާއިރު ދުނިޔޭގަ ފަސް ލައްކައަށް ވުރެވެސް މަދުން މީހުން ދިރިއުޅޭ ކުޑަ ކުޑަ ގައުމެއްގައި މިހާރު ރާއްޖޭގައި އޮތް ގާނޫނު އަސާސީން ބަޔާން ކުރާ މިންވަރަށް ދައުލަތުގެ މުއައްސަސާތައް ހުރި އެއްވެސް ގައުމެއް ނޯންނާނެ ކަމަށެވެ.
ފަޔާޒު ވިދާޅުވީ އެންމެންގެ ދުލުން މި އަންނަނީ ގައުމުގެ ކަންތައްތައް ހަމަ މަގުން ކައްސާލައި ވާހަކައާއި ގައުމުގެ ކަންތައްތައް މުޅިން ބޮންސުން ލައިގެން ގޮސް ގައުމުމުގެ ހުރިހާ ކަމެއް "ގޯސް" ވާ ވާހަކަ ކަމަށެވެ. އަދި ވަކިން އިދިކޮޅުގައި ތިބެގެން އެއިރަކު އޮންނަ ސަރުކާރުގެ ވެރިންނަށް އަމާޒުކޮށް ދައްކާލެއް އިތުރު ކަމަށާއި ވެރިކަން ލިބުމުން މިފަދަ ވާހަކަތައް ދެއްކުން ހުއްޓާލާ ކަމަށެވެ.
ފަޔާޒު ވިދާޅުވީ ގާނޫނު އަސާސީގެ މާއްދާ ހަތަރެއްގައި ބުނާ ހުރިހާ ބާރުތައް ފެށިގެން އަންނަނީ ރައްޔިތުންގެ ކިބައިންނޭ ބުނާ ބުނުމުގެ މާނައަކީ ދިވެހި ކޮންމެ ރައްޔިތެއްގެ އަތުގައި ހުރިހާ ބާރެއް އޮންނަ ވާހަކައެއް ނޫންކަމަށާއި އޭގެ އެ ބުނަނީ އަޅުގަނޑުމެނަށް ބޭނުންވާ ކަންކަން ހަމަޖައްސަށް ރައްޔިތުންގެ ވޯޓުން މީހުންނާއި މަތިކުރާ ވާހަކަ ކަމަށެވެ. އެގޮތުން ރައީސުލްޖުމުހޫރިއްޔާ އާއި ރައްޔިތުންގެ މަޖިލިސް މެންބަރުން ވެސް ވޯޓުން ހޮވާ ކަމަށެވެ. ނަމަވެސް މި ދެ ގުނަވަނުން ތެދުވެރި ވަނީ ރައްޔިތުންނަށް ނޫން ކަމަށާއި މި މީހުން އަމާނަތްތެރި ވަނީވެސް ރައްޔިތުންނަށް ނޫން ކަމަށެވެ.
ފަޔާޒު ވިދާޅުވީ ވެރިކަމުގެ ފަރާތުން އަދުލުވެރި ވެރިކަމެއް ގާއިމްކުރުމަށް އެންމެނަށް އެއް އުސޫލަކުން އެއްހަމަ އަކުން އަދުލުވެރިވާން ޖެހޭ ކަމަށާއި މި ހާލަތު ސަރުކާރާއި ދައުލަތް ހިންގަން ތިބޭ މީހުންގެ ފުށުން ނުފެންނަނީ ގަވަރނާންސް ބޮޑު ތަނުން ދަށަން ދިޔުމުން ކަމަށެވެ. ފަޔާޒު ވިދާޅުވީ ރައްޔިތުން އަތުގައި ހުރިހާ ބާރެއް ބާއްވަން އެދޭ ކަމަށް ވާނަމަ ގާނޫނު ތަކަށް މިހާރު ބަދަލު ގެންނަށް ޖެހޭކަމަށެވެ. އެގޮތުން ދުނިޔޭގެ ބައެއް ގައުމުތަކުގައި ގާނޫނުތައް ހުރީ ރައްޔިތުން މަޖިލިސް ހޮވޭ މީހާ ގައުމީ މަސްލަހަތަށާއި ދާއިރާގެ މަސްލަހަތައް އިސްކަން ނުދީ އުޅޭނަމަ ވަކިކުރެވޭ ގޮތަށެވެ. އެގޮތުން ރައްޔިތުން އެކަމުގައި އިސްނަގައިގެން ޕެޓިޝަންއެއް ހަދައިގެން ނޫނީ ވަކި ވަރަކަށް ސޮއި ހުށަހެޅީމަ މެންބަރުކަމުގެ ގޮނޑި ގެއްލޭ ފަދަ އުސޫލްތައް އަދި ގާނޫނުތައް ދުނިޔޭގެ ބައިވަރު ގައުމުތަކުގައި އެބަހުރި ކަމަށެވެ.
ގައުމެއްގެ ތައުލީމީ މީހުން ކަމެއްގައި ފަހަތަށް ޖެހިއްޖެނަމަ އެގައުމެއްގެ ކަންތައްތައް ދާނީ ވަރަށް ބޮޑަށް ގޯހުން ގޯހަށްކަން ފާހަގަކުރައްވާ ފަޔާޒު ވިދާޅުވީ އާ އޮނިގަނޑެއްގައި އިންތިހާބީ މީހާ ރައްޔިތުންގެ ގައުމީ މަސްލަހަތު ކުރިޔަށް ނެރެގެން މަސައްކަތް ނުކުރެވެއްޔާ އެމީހުން ދުރުކުރެވޭނެ ނިޒާމެއް ގާނޫނުގައި އޮންނަން ޖެހޭ ކަމަށާއި އަދި މަޖިލިސް މެންބަރުންނަކީ އަމިއްލަ އަށް މުސާރަ ކަނޑައަޅާ ބަޔަކަށް އޮންނަ އޮތުން ވެސް ބަދަލުވާން ޖެހޭ ކަމަށެވެ. އަދި ވިދާޅުވީ ތައުލީމީ މީހުން ސިޔާސި ކަންކަމުގައި ނޫޅެނިއްޔޭ އަދި ސިޔާސީންގެ ތެރޭގައި އިހުލާސްތެރިން ނެތިއްޔޭ މިހެން ކިޔަކިޔާ ތިބެވޭކަށް ނެތް ކަމަށާއި ހާލަތު ބަދަލުކުރެވޭނީ ދައުލަތާއި ސަރުކާރު ހިންގުމުގެ އޮނިގަނޑު ބަދަލުތަކެއް ގެނެވިގެން ކަމަށެވެ.
