ފޯރަމްގެ ސްޓޭޖުގައި އައިޝްވަރިޔާގެ ނަން ދެއްކި ބެކްޑްރޮޕްގައި ލިޔެފައި އޮތީ "އައިޝްވަރިޔާ ރާއީ - އިންޓަނޭޝަނަލް ސްޓާ" ކަމަށްވުމާއެކު، އޭނާގެ ފިރިމީހާގެ ނަމާ ގުޅިގެން ގިނަ ބަޔަކު ސުވާލު އުފައްދާފައިވެއެވެ. ނަމަވެސް "ނިއުސް 18" އިން ކުރި ތަހުގީގަކުން ދައްކާގޮތުގައި މިއީ އެއްވެސް ހާލެއްގައި އޭނާގެ ކައިވެނި ރޫޅުނު ކަމުގެ ނިޝާނެއް ނޫނެވެ.
އައިޝްވަރިޔާގެ އިންސްޓަގްރާމް ޕްރޮފައިލްގައި މިވަގުތުވެސް އޭނާގެ ނަން ލިޔެފައިވަނީ "އައިޝްވަރިޔާ ރާއީ ބަޗަން" ގެ ގޮތުގައެވެ. އަދި ދުބާއީގެ ފޯރަމްގައި އެގޮތަށް ނަން ބޭނުންކޮށްފައިވަނީ ހަމައެކަނި ޕްރޮފެޝަނަލް ބޭނުމަށް ކަމަށް ވެއެވެ.
އައިޝްވަރިޔާ އާއި އަބިޝެކް ބަޗަންގެ ގުޅުމާމެދު ސުވާލު އުފެދިފައިވަނީ އަނަންތް އަމްބާނީ އާއި ރާދިކާ މާޗަންޓްގެ ކައިވެނީގެ ހަފްލާގައި ދެމަފިރިން ވަކިން ފެނުމާ ގުޅިގެންނެވެ. އަދި އެންމެ ފަހުން އާރާދިޔާގެ އުފަންދުވަހުގެ ފޮޓޯތަކުގައި ބަޗަން އާއިލާގެ މެމްބަރުން ނެތުމުންވެސް މިވާހަކަތައް އިތުރަށް ފެތުރިފައިވެއެވެ.
