ރައީސް ފޮނުއްވި ތަހުނިޔާގެ މެސެޖުގައި، ދިވެހިރާއްޖެއާއި ލުބްނާނާ ދެގައުމުގެ ދެމެދުގައި އޮތް ގާތް ގުޅުމަކީ އިސްލާމީ ރިވެތި އަހުލާގުގެ މަތީގައި ބިނާވެފައިވާ ގާތް ގުޅުމެއްކަން ފާހަގަކުރައްވާފައިވެ އެވެ. އަދި ދެގައުމުގެ ދެމެދުގައި ވާ އަހުވަންތަ ގުޅުން އިތުރަށް ބަދަހިކުރެއްވުމަށް މަސައްކަތް ކުރައްވާނެކަމުގެ ޔަގީންކަން ރައީސް ވަނީ ދެއްވާފަ އެވެ.
ރައީސްގެ މެސެޖުގައި، ވަނީ ލުބްނާނަށް ސުލްހަމަސަލަސްކަމާއި އިތުރު ކުރިއެރުންތައް ހޯއްދަވައިދެއްވުމުގައި ލުބްނާނުގެ ރައީސްކަމުގެ މަގާމަށް އިންތިހާބުވެވަޑައިގެންނެވި ހިޒް އެކްސެލެންސީ ޖޯސެފް އައޫންއަށް، ހިކުމަތްތެރިކަމާއި ކާމިޔާބަށް އެދިވަޑައިގެންފައި އެވެ.
ރައީސްގެ މެސެޖު ނިންމަވާލައްވަމުން، ވަނީ ލުބްނާނުގެ އާ ރައީސް، އައުންއަށް ދުޅަހެޔޮ ސިއްހަތެއްގައި ލެހެއްޓެވުމާއެކު، އުފާފާގަތިކަމާއި، ލުބުނާނުގެ އަހުވަންތަ ރައްޔިތުންނަށް ސުލްހަމަސަލަސްކަމާއި ކުރިއެރުމަށް އެދިވަޑައިގެންފައި އެވެ.
ލުބްނާނުގެ ކުރީގެ ރައީސް، މިޗެލް އައުންގެ ވެރިކަން 2022 ވަނަ އަހަރުގެ އޮކްޓޯބަރު މަހު ވައްޓާލި ފަހުން އެގައުމުގެ ރައީސްގެ މަގާމަށް މީހަކު އައްޔަންކޮށްފައި ނުވެ އެވެ. އެއަށް ފަހު ރައީސްކު ހޮވުވަށް ގާނޫންހަދާ މަޖިލީހުގައި މަސައްކަތްތަކެއް ކުރެވުނު ނަމަވެސް، ހިޒްބުﷲގެ ނުފޫޒާ ގުޅިގެން ރައީސަކު ހޮވޭ ގޮތް އޮތީ ނުވެފަ އެވެ.
އައޫނަށް ރައީސްކަމުގެ މަގާމަށް އައުމަށް ފުރުސަތު ފަހިވީ ހިޒްބުاللهން ތާއީދު ކުރި ސުލައިމާން ފްރަންޖިއްޔަ އޭނާގެ ނަން އަނބުރާ ގެންގޮސް އައޫން ތާއީދު ކުރުމުންނެެވެ. ގާނޫނުހަދާ މަޖިލީހުގައި ނެގި ވޯޓުގެ ފުރަތަމަ ބުރުން މަގާމަށް އައްޔަނު ކުރުމަަށް ބޭނުންވާ 86 ވޯޓު އައޫނަށް ލިބިވަޑައިގެންފައެއް ނުވެ އެވެ. ނަމަވެސް ހިޒްބުاللهއާއި އެ ޖަމާޢަތަށް ތާއީދު ކުރާ ޝީއީންގެ ޢަމަލް މޫވްމަންޓުގެ މެންބަރުންގެ ވޯޓާ އެކު ދެ ވަނަ ބުރުގައި އައޫނަށް ވަނީ 99 ވޯޓު ލިބިވަޑައިގެންފަ އެވެ.
އުމުރުން 60 އަހަރުގެ އައޫނަކީ 2017ވަނަ އަހަރުން ފެށިގެން ލުބްނާނުގެ އަސްކަރިއްޔާގެ އެންމެ މަތީ ވެރިޔާއެވެ. އޭނަގެ މޭސްތިރިކަމުގެ ދަށުން ލުބްނާނުގެ އަސްކަރިއްޔާއަށް އެމެރިކާގެ ފަރާތުން ގިނަ އެހީތަކެއް ލިބެ އެވެ. އެއީ ލުބްނާނުގެ މުޖާހިދުންގެ ޖަމާއަތް, ހިޒްބުاللهގެ ބާރު ކުޑަ ކުރުމަށް އެމެރިކާއިން ގެންގުޅޭ ސިޔާސަތެއްގެ ދަށުންނެެވެ.
ރައީސްކަމާ ހަވާލުވެވަޑައިގެން ގާނޫންހަދާ މަޖިލީހުގައި އައޫން ވިދާޅުވީ، ލުބްނާން އަލުން އާބާދުކޮށް ތަރައްގީކުރުމަށް ސިޔާސީ ލީޑަރުންގެ އެހީތެރިކަން ބޭނުންވާނެ ކަމަށެވެ. ސަރުކާރެއް އެކުލަވާލި ނަމަވެސް، ކުރިއަށް ދާން އޮތް ގޮތް އޮޅުންފިލުވުމުގައި އިދިކޮޅު ސިޔާސީ ލީޑަރުންގެ އެހީތެރިކަމަށް ބޭނުންވާނެ ކަމަށް އޭނާ ވިދާޅުވި އެވެ.
