ރޭ މެންދަމު އެކެއް ޖެހިއިރުންސުރެން ފެށިގެން ވެރިރަށް މާލެއަށް ބޯކޮށް އަންނަނީ ވާރޭ ވެހެމުންނެވެ. ހުއްޓާ ނުލާ ވެހުމުން މާލޭގެ ބޮޑު ބައެއްގައި ވަނީ ފެން ބޮޑުވެފައެވެ.
އެންމެ ބޮޑަށް ފެން ބޮޑުވެފައިވަނީ މާފަންނުގެ ސަރަހައްދުގައެވެ.
މާލޭގެ މަގުތަކުން ފެން ހިންދުމުގެ މަސައްކަތް ސިފައިންނާއި ފުލުހުންނާއި ސިޓީ ކައުންސިލް ގުޅިގެން އަންނަނީ ކުރަމުންނެވެ.
އެމްއެންޑީއެފުން ބުނީ މިހާރު މާލޭގެ 9 ސަރަހައްދެއްގައި ޕަންޕު ބަހައްޓައިގެން ފެން ހިންދުމުގެ މަސައްކަތް ކުރަމުން އަންނަކަމަށެވެ. އޭގެތެރޭގައި ވެސްޓް ޕާކު ސަރަހައްދުގައި 5 ޕަންޕް، އައިޖީއެމްއެޗް ސަރަހައްދުގައި 2 ޕަމްޕް ބޮޑުވަޅު ސަރަހައްދުގައި 1 ޕަންޕު ބަހައްޓައިގެން ފެން ހިންދުމުގެ މަސައްކަތް ކުރަމުން ދާކަމަށްވެސް އެމްއެންޑީއެފުން ބުނެއެވެ.
މީގެއިތުރުން އެމްއެންޑީއެފް މާލޭ އޭރިއާ ކޮމާންޑުން، ވެލިބަސްތާ ޖެހުމުގެ މަސައްކަތް ވެސް ކުރަމުންދާކަމަށް އެމްއެންޑީއެފުން ބުނެއެވެ. އަދި މިހާތަނަށް 27 ގެއަކަށް އެހީތެރިކަން ފޯރުކޮށްދެވިފައިވާކަމަށް އެމްއެންޑީއެފުން ބުނެއެވެ.
ނޭޝަނަލް ޑިޒާސްޓާ މެނޭޖްމަންޓް އޮތޯރިިތީ (އެންޑީއެމްއޭ ) އިން ބުނީ ބޯކޮށް ވާރޭވެހި މާލޭގައި ފެންބޮޑުވެގެން ވެލިބަސްތާ ޖެއްސުމާއި ފެން ހިއްކުމުގެ މަަސައްކަތް ދިވެހި ސިފައިންނާއި ފުލުހުން އަދި ސިޓީ ކައުންސިލް ގުޅިގެން ކުރަމުން އަންނަކަމަށެވެ. އަދި ގޭބިސީތަކުގެ ހާލަތު ގާތުން މޮނިޓާ ކުރަމުންދާކަމަށްވެސް އެ އޮތޯރިޓީން ބުނެއެވެ.
