ސިފައިންގެ ކްލަބުން ގައުމީ ތަށި ހޯދީ، އެޗްޑީސީން އެއް ސެޓު ގެންގޮސްފައިވަނިކޮށް، ފަހަތަރުން އަރައި ތިން ސެޓު ނަގައިގެންނެނެވެ. ރޭ އެޗްޑީސީ ވަނީ 25-17 އިން ފުރަތަމަ ސެޓް ކާމިޔާބު ކޮށްފަ އެވެ. ސިފައިން ވަނީ ޖެހިގެން ކުޅުނު ތިން ސެޓު ވެސް ކާމިޔާބު ކޮށްފަ އެވެ. ސިފައިން ސެޓްތައް ގެންދިޔައީ 25-21، 25-16 އަދި 25-23 އިންނެވެ. ފައިނަލް މެޗުގެ މޮޅު ކުޅުންތެރިއަކީ ސިފައިންގެ ޓީމުގެ ހުސެއިން ރަޒާން އެވެ.
އެޗްޑީސީން ވަނީ މި ފަަަހަރުގެ ވޮލީބޯޅަ ސީޒަނުގައި، އެސޯސިއޭޝަން ކަޕާއި ގައުމީ ލީގު ކާމިޔާބުކޮށްފަ އެވެ. މީގެ ކުރިން ސީޒަނުގެ ތިން މުބާރާތް ކާމިޔާބުކޮށް ރެކޯޑެއް ހަދާފައިވަނީ 2010 ވަނަ އަހަރު ދިވެހި ސިފައިންގެ ކްލަބުންނެވެ. ސްޕޯޓްސް ކްލަބް ސިޓީން ވަނީ 2022 ވަނަ އަހަރުގެ ސީޒަނުގެ ތިން މުބާރާތް ކާމިޔާބުކޮށް ސިފައިންގެ އެެ ރެކޯޑާ ހަމަކޮށްފަ އެވެ. އެ ރެކޯޑާ ހަމަކުރަން އެޗްޑީސީން އުންމީދުކުރިއިރު، ރޭގެ ފައިނަލުން ބަލިވެ، އެކަން ހާސިލްނުވީ އެވެ.
ގައުމީ ވޮލީ މުބާރާތް 2024 ގެ އެންމެ މޮޅު ތިން ކުޅުންތެރިންނަކީ ސިފައިންގެ ކުލަބުގެ ހުސައިން ރަޒާން އާއި ސެޓަރު ހުސައިން ޝާހިދުގެ އިތުރުން އެޗްޑީސީގެ އިސްމާޢީލް ސާޖިދު (ކުޑަކާއްޓޭ) އެވެ. އަދި 19 އަހަރުން ދަށުގެ އެންމެ މޮޅު ކުޅުންތެރިއަކަށް ހޮވުނީ ބްލޫސް ފޯ ވޮލީބޯލްގެ އަހުމަދު އިލްހާމް އަލީ އެވެ. ގައުމީ މުބާރާތުގެ އެންމެ މޮޅު ބިދޭސީ ކުޅުންތެރިޔާގެ މަގާމު ސިފައިންގެ ކުލަބުގެ މުހައްމަދު ހަމަދު ހޯދިއިރު، އެންމެ މޮޅު ކޯޗަކީ އެ ޓީމުގެ މުމްތާޒް އަލީ އެވެ.
