މައުލޫމާތު ލިބިފައިވާ ގޮތުގައި ރާއްޖެއާ އިންޑިޔާ ކުޅޭ އެކުވެރިކަމުގެ މެޗު އޮންނާނީ އަންނަ މާރިޗު މަހު އޮންނަ އޭޝިއަން ކަޕް ކޮލިފައިން މެޗުގެ ކުރިންނެވެ. އިންޑިޔާއާ ރާއްޖޭގެ މެޗު ކުޅެން ނިންމާފައިވަނީ އިންޑިޔާގައެވެ. އެހެންނަމަވެސް ކުޅޭނީ އިންޑިޔާގެ ކޮން ސްޓޭޑިއަމެއްގައި ކަމެއް އަދި ނިންމާފައެއް ނުވެއެވެ.
އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް)އާ ހަވާލާދީ އިންޑިއާގެ މީޑިއާތަކުން ރިޕޯޓްކުރާގޮތުގައި، އިންޑިއާ އިން އޭޝިއަން ކަޕްގެ ކޮލިފައިން އަށް ތައްޔާރުވުމުގެ ގޮތުން މެޗެއް ކުޅެން ހަމަޖެހިފައިވަނީ ރާއްޖެއާ ދެކޮޅަށެވެ. ރިޕޯޓްތައް ބުނާ ގޮތުން މި މެޗު ކުޅޭނީ މާރިޗު މަހުގެ 19 ނުވަތަ 20 ގައެވެ.
ރާއްޖެއާ ދެކޮޅަށް އިންޑިޔާއިން މީގެ ކުރިން ވަރަށް ގިނަ މެޗު ކުޅެފައިވާއިރު، އިންޑިއާ ވަނީ 15 މެޗުން މޮޅުވެފަ އެވެ. އިންޑިޔާ އަތުން ރާއްޖެ މޮޅުވެފައިވަނީ ހަތަރު މެޗުންނެވެ. ރާއްޖެއާއި އިންޑިޔާގެ ދެ މެޗެއް އެއްވަރުވެފައިވެއެވެ. އެންމެ ފަހުން، މި ދެ ޓީމު ބައްދަލުކުރީ 2021 ވަނަ އަހަރު މާލޭގައި ކުޅުނު ސާފް ޗެމްޕިއަންޝިޕްގަ އެވެ. އެ މެޗުން އިންޑިއާ ވަނީ 3-1 އިން ރާއްޖެ ބަލިކޮށްފަ އެވެ. އެ މެޗުގައި އިންޑިޔާގެ އޭރުގެ ކެޕްޓަން ސުނިލް ޗެތްރީ ހެޓްރިކެއް ހެދިއެވެ.
އޭޝިއަން ކަޕް ކޮލިފައިންގައި ރާއްޖެ ކުޅޭ ފުރަތަމަ މެޗުގައި މާޗް 25 ވަނަ ދުވަހު މާލޭގައި ކުޅޭނީ ފިލިޕީންސާ އެވެ. ހަމަ އެ ދުވަހު، އިންޑިއާ އިން ކޮލިފައިންގައި ކުޅޭ ފުރަތަމަ މެޗުގައި، އަމިއްލަ ދަނޑުގައި ބައްދަލުކުރާނީ ބަންގްލަދޭޝާ އެވެ.
