ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ރާއްޖޭގެ ފުޓްބޯޅަ ސީޒަން ފެށުން ފެބްރުއަރީ 14 އަށް ހަމަޖައްސައި، ކަލަންޑަރު ފައިނަލްކޮށް ކްލަބްތަކަށް ފޮނުވާފައިވާއިރު، ދިވެހި ލީގު ފަށަން ރާވާފައި އޮތީ އޭޕްރީލް މަހުގެ އަށްވަނަ ދުވަހުއެވެ.
އެފްއޭއެމްގެ ޖެނެރަލް ސެކެއްޓްރީކަންވެސް ކުރައްވާފައިވާ ހާމިދު، ރާއްޖޭގެ ފުޓްބޯޅައިގެ ހާލަތާ މެދު ސިލްސިލާކޮށް ލިޔުއްވާ ރިޕޯޓްތަކުގެ ތެރެއިން އެންމެ ފަހުން ލިޔުއްވި ރިޕޯޓުގައި ވިދާޅުވީ ދިވެހި ލީގް ރާވާފައިވަނީ އަސާސީ ގަވާއިދާ ހިލާފަށް ކަމަށެވެ. ހާމިދު އެހެން ވިދާޅުވީ، ރީޖަނަލް އެސޯސިއޭޝަން ތައް މެދުވެރިކޮށް، ބާއްވަން ޖެހޭ އަތޮޅުތަކަށް މުބާރާތްތައް ނުބާއްވާތީ އެވެ.
ހާމިދު ވިދާޅުވީ، އަސާސީ ގަވާއިދުގެ 10 ވަނަ މާއްދާގެ 1 ގެ "އޭ" ގައި ރާއްޖޭގެ އެއްވަނަ ޑިވިޒަންގައި އޮންނަންވާނީ 8 ކްލަބް ކަމަށް ކަނޑައަޅާފައި އޮތްނަމަވެސް މިއަހަރު ދިވެހި ލީގުގައި 10 ކްލަބް ބައިވެރިކުރާ ކަމަށެވެ.
މިއީ، އަސާސީ ގަވާއިދާ ހިލާފަށް ނޯމަލައިޒްކޮމިޓީން އަޅާ ކަތި ފިޔަވަޅެއް ކަމަށް ހާމިދު ވިދާޅުވިއެވެ. އަދި ހާމިދު ވިދާޅުވީ ގޮތުގައި އެއީ ފުޓުބޯޅަ ގާނޫނާ ހިލާފަށް ކުރާ ކަމެކެވެ. ހާމިދު ވިދާޅުވި ގޮތުގައި އެއީ އަސާސީ ގަވާއިދުގެ 73 ވަނަ މާއްދާގެ 1 ގެ "އޭ" ގައި އެބުނާ ދިވެހި ލީގެއް ނޫނެވެ. ދިވެހި ލީގު ކުޅެންވީގޮތް އޮތީ 10 އާއި 18 ވަނަ މާއްދާގައި ބަޔާންކޮށްފައި ކަން ހާމަ ކުރައްވާ ހާމިދު ވިދާޅުވީ އެއްވަނަ ޑިވިޒަންއަށް ކޮލިފައިވާނީ ރީޖަނަލް (ޒޯން) ޗެމްޕިޔަނުންކަމަށެވެ.
އެފްއޭމުން ރާއްޖޭގެ ފުޓްބޯޅަ ސީޒަން ފެށުން ފެބްރުއަރީ 14 އަށް ހަމަޖައްސައި، ކަލަންޑަރު ފައިނަލްކޮށް ކްލަބްތަކަށް ފޮނުވާފައިވާއިރު، ފުޓްބޯޅަ ސީޒަން ފެށުމަށް އޮތް އެންމެ ބޮޑު ދައްޗަކީ ކްލަބްތަކުގެ މާލީ ހާލަތެވެ. ފުރަތަމަ ޑިވިޝަނުގެ ބައެއް ޓީމުތައް މި ވަގުތު އޮތީ ކުޅުންތެރިންނަށް ނުދީ ހުރި މުސާރައިގެ ސަބަބުން، ކްލަބް ލައިސަންސިން ކަންކަން ފުރިހަމަ ނުވެ އެވެ. އެނގިފައިވާ ގޮތުގައި، އެފްއޭއެމް އިން އަންނަނީ ފީފާ އާއި ސަރުކާރާ އެކު މަޝްވަރާތަކެއްކޮށް މި ކަމަށް މި ވަގުތު ގެނެވޭނެ ހައްލުތަކަކާ ގުޅޭގޮތުން މަޝްވަރާ ކުރަމުންނެވެ.
