ނަޝީދު މިހެން ވިދާޅުވީ އެމަނިކުފާނު ހިމެނިވަޑާއިގެންނަވާ ދަ ޑިމޮކްރެޓްސްގެ އިސްވެރިންތަކެއް އެޕާޓީ ދޫކޮށް އެމްޑީޕީއަށް ގުޅިފައިވަނިކޮށް މިއަދު އެކްސްގައި ކުރެއްވި ޕޯސްޓެއްގައެވެ.
ނަޝީދު ވިދާޅުވީ އެ މަނިކުފާނުގެ ހަޔާތުގެ ބޮޑު ބައެއް ހޭދަކުރެއްވީ ރާއްޖޭގައި ގިނަ ޕާޓީ އެކުލެވޭ ނިޒާމެއް ގާއިމުކުރުމުގެ މަސައްކަތުގައި ކަމަށެވެ. އަދި ގައުމެއްގެ ތަރައްގީއަށާއި ރައްޔިތެއްގެ ތަނަވަސް ކަމަށް އެންމެ ބޭނުން އެއް ވަސީލަތަކީ ވާދަވެރި ސިޔާސީ ހަރަކާތެއްކަމަށްވެސް ރައީސް ނަޝީދު ވިދާޅުވިއެވެ.
ނަޝީދު ވިދާޅުވީ އެމަނިކުފާނަކީ އެއްވެސް ސިޔާސީ ޕާޓިއަކާއި އިދިކޮޅުވާނެ މީހެއް ނޫންކަމަށެވެ. އެގޮތުން އެމްޑީޕީއަކީ އެމަނިކުފާނުގެ ދަރިއެއް ފަދަ ޕާޓިއެއް ކަމަށާއި އެޕާޓި ވަރު ގަދަވެ އޮތުމަކީ އަބަދުވެސް އެދޭކަމެއްކަމަށް ނަޝީދު ވިދާޅުވިއެވެ. އަދި އެމަނިކުފާނު ިއއްވެ ހުންނަވާ ފަހުން އުފެއްދި ދަ ޑިމޮކްރެޓްސް އަކީ ހާއްސަ ގޮތެެއްގައި ޒުވާނުންނަށް ސިޔާސީ ކަންކަމުގައި ބައިވެރިވުމަށް ލިބުނު ފުރުސަތެއްކަމަށްވެސް ނަޝީދު ވިދާޅުވިއެވެ.
ކުރިން އެމްޑީޕީގައި އިސް މަގާމުތަކުގައި ތިބުމަށްފަހު ދަ ޑިމޮކްރެޓްސް އުފެއްދި ބައެއް މެމްބަރުން ވަނީ އެޕާޓިން ވަކިވެ އަލުން އެމްޑީޕީއާ ގުޅިފައެވެ. އޭގެ ތެރޭގައި އެމްޑީޕީގެ ކުރީގެ ޗެއާޕާސަން އަދި ފަހުން ޑިމޮކްރެޓްސްގެ ރައީސް ހަސަން ލަތީފާއި އެމްޑީޕީގެ ކުރީގެ ނައިބު ރައީސް އަދި ފަހުން ޑިމޮކްރެޓްސެގެ ނައިބު ރައީސްގެ ގޮތުގައި ހުންނެވި މުހައްމަދު ޝިފާޒާއި، މެދު ހެންވޭރު ދާއިރާގެ ކުރީގެ މެމްބަރު އަލީ އާޒިމްގެ އިތުރުން މިދިޔަ އެމްޑީޕީ ވެރިކަމުގައި އެސްޓީއޯގެ އެމްޑީކަން ކުރެއްވި ހުސައިން އަމްރު ހިމެނިވަޑައިގަންނަވައެވެ.
