ރައީސް އޮފީހުގައި ކުތިޔަށްދާ ނޫސްވެރިންގެ ބައްދަލުވުމުއްގައި ވާހަކަ ދައްކަވަމުން މިނިސްޓަރު މުއްތަލިބް ވިދާޅުވީ "ގެދޮރުވެރިޔާ" ސްކީމަށް ހުށަހެޅި ހުރިހާ ފޯމެއް އިވެލުއޭޓު ކުރުމުގެ ބަދަލުގައި މިދިޔަ ސަރުކާރުން ގެޒެޓުކޮށްފައިވާ ފައިނަލް ލިސްޓުގައިވާ މީހުންގެ އިވެލުއޭޝަނެއް ކުރިއަށް ގެންދަން ނިންމާފައިވާކަމަށެވެ.
އެގޮތުން ފައިނަލް ލިސްޓު ވެރިފައިކުރުމުގައި ބަލާނީ ފްލެޓަށް އެދި ހުށަހެޅުމާ ގުޅޭ ގޮތުން 26 ޖޫން 2022ގައި އާންމުކޮށްފައިވާ އުސޫލާއި ފްލެޓަށް އެދި ހުށަހެޅި ޕޯޓަލްގައިވާ ކަންތައްކަމަށް މިނިސްޓަރު މުއްތަލިބް ވިދާޅުވިއެވެ.
މިނިސްޓަރު މުއްތަލިބް ވިދާޅުވީ ރޯދަމަހުގެ ކުރިން ފައިނަލް ލިސްޓް އާއްމުކުރުމަށް ގެޒެޓް ކުރުމަށް މަސައްކަތް ކުރަމުން އަންނަކަމަށް ވިދާޅުވިއެވެ. މުއްތަލިބް ވިދާޅުވީ ފްލެޓް ލިސްޓް އެކުލަވާލިއިރު ފާހަގަކުރެވުނު އެންމެބޮޑު އެއް މައްސަލައަކީ މާލޭގައި މެދުނުކެނޑި އުޅުނު މުއްދަތު ބެލުމުގައި އެއްހަމައެއް ގެންގުޅެފައި ނުވުން ކަމަށެވެ.
އެގޮތުން ވަކިން ހާއްސަކޮށް މާލޭގައި މެދުނުކެނޑި 15 އަހަރު އުޅުނުކަން ބެލުމަށް އެކި ފަރާތްތަކަށް އެކި ގޮތްގޮތަށް އަމަލުކޮށްފައިވާކަން ފާހަގަކުރައްވަމުން މިނިސްޓަރު މުއްތަލިބް ވިދާޅުވީ މާލޭގައި ދިރިއުޅޭތާ 15 އަހަރުވީކަން ސާބިތު ކުރުމަށް ހުށަހެޅިދާނެ ކަމަށް ޕޯޓަލްގައި ބަޔާންކޮށްފައިވާ ލިޔުންތަކަށް ބަލާނެކަމަށެވެ.
ގެދޮރުވެރިޔާ ހައުސިން ސްކީމުގެ ދަށުން ފްލެޓަށް ހުޅުވާލުމުން 2 ކޮޓަރި އަދި 3 ކޮޓަރީގެ ފްލެޓަށް އެދި ޖުމްލަ 20،697 ފޯމު ވަނީ ހުށަހަޅައިފައެވެ. އޭގެތެރޭގައި ހިމެނެނީ 2 ކޮޓަރީގެ އެޕާޓުމެންޓަށް ހުށައެޅި 6،208 ފޯމާއި 3 ކޮޓަރީގެ އެޕާޓުމެންޓަށް ހުށައެޅި 14،489 ފޯމެވެ.
