އެންމެ ބޮޑު އިދިކޮޅު ޕާޓީ އެމްޑީޕީން، ރައީސް މުހައްމަދު މުއިއްޒުގެ ވެރިކަމުގައި ފުރަތަމަ ފަހަރަށް މަގުމައްޗަށް ނުކުންނަން ތައްޔާރުވަމުން އަންނައިރު، އެމްޑީޕީގެ ލީޑާޝިޕުން އަންނަނީ ޖެނުއަރީ 31 ވަނަ ދުވަހު ބާއްވަން ނިންމާފައިވާ ހިނގާލުމަށް އާއްމުންގެ ސަޕޯޓް ހޯދުމަށް ގިނަ މަސައްކަތްތަކެއް ކުރަމުންނެވެ. މި މަސައްކަތުގެ ދަށުން މާލެއާއި ހުޅުމާލެ އަދި ވިލިމާލޭގައި އެމްޑީޕީގެ ލީޑަރޝިޕުންވަނީ ހަރަކާތްތަކެއް ބާއްވާފައެވެ.
މި ގޮތުން މިއަދު ވިލާމާލޭގައި ބޭއްވި ހަރަކާތްތަކަށް ފަހު، ސޯޝަލް މީޑިއާގައި ޝާހިދު ވިދާޅުވީ އެމްޑީޕީއާއެކު އާއެކު ނިކުތުމަށް ރައްޔިތުން ތިބީ ތައްޔާރަށް ކަމަށެވެ.
މި މަހުގެ 31 ވަނަ ދުވަހު އެމްޑީޕީން ބާއްވާ ހަރަކާތަކީ، އެމްޑީޕީގެ ގައުމީ މަޖިލީހުން ފާސްކޮށްގެން ބާއްވާ ހަރަކާތެކެވެ. މި ހަރަކާތްތައް މުޅި ރާއްޖެއަށް ފުޅާކުރުމަށް ވެސް އިދިކޮޅު މައި ޕާޓީ، އެމްޑީޕީނވަނީ ނިންމާފަ އެވެ. އަދި މި ހަރަކާތްތަކުގައި އެހެން ސިޔާސީ ޕާޓީތަކާއި މަދަނީ ޖަމިއްޔާތަކުގެ އިތުރުން އާންމު ރައްޔިތުން ވެސް ބައިވެރިކުރުމަށް ދައުވަތު ދިނުމަށް ވެސް ވަނީ އެމްޑީޕީންވަނީ ފާސްކޮށްފަ އެވެ.
އެމްޑީޕީން މި ހަރަކާތްތައް ފަށަން ނިންމީ ރައްޔިތުންގެ މަޖިލީހުގެ މެންބަރެއް ޕާޓީން ވަކިކޮށްގެން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި ބަދަލާ ގުޅިގެންނެވެ. އެމްޑީޕީން ބުނާ ގޮތުގައި މި ބަދަލުތަކަކީ ގާނޫނުއަސާސީގެ ބާރު ކަނޑުވާލައި، ވެރިކަމުގެ ނިޒާމު މަސްހުނިކޮށްލާ ބަދަލުތަކެކެވެ. މީގެ ކުރިން ވެސް އެމްޑީޕީން ވަނީ ގާނޫނުއަސާސީގެ ދިފާއުގައި ކަމަށް ބުނެ ޑިސެމްބަރު 10 ގައި ކާނިވާ ސަރަހައްދުގައި ޖަލްސާއެއް ވެސް ބާއްވާފަ އެވެ.
