އަތޮޅު ރައީސްކަމުގެ މަގާމަށް ހުޅުވާލުމުން އެކަމަށް ކުރިމަތިލެއްވީ މުހައްމަދު ވަހީދު އެކަންޏެވެ. އެހެންވުމުން އޭނާ އަތޮޅު ރައީސްކަމަށް އިންތިހާބުވެވަޑައިގެންނެވީ އިންތިހާބަކާ ނުލައި އެވެ.
އާ ރައީސް މަގާމުގެ ހުވާކުރެއްވުމަށް މިއަދު ހެނދުނު ހދ ސްޓޭޓް ހައުސްގައި ބޭއްވި ރަސްމިއްޔާތުގައި ހުވާ ލައިދެއްވީ ކުޅުދުއްފުށީ މެޖިސްޓްރޭޓް ކޯޓްގެ އިސް މެޖިސްޓްރޭޓް މުހައްމަދު އިސްމާއިލެވެ.
ހދ އަތޮޅު ކައުންސިލް ރައީސްގެ މަގާމު ހުސްވީ މިދިޔަ އަހަރުގެ އޯގަސްޓްމަހުގެ އެ މަގާމުގައި ހުންނެވި މުހައްމަދު ސިރާޖްގެ އިތުބާރު ނެތްކަމުގެ ވޯޓް ނަގައި މަގާމުން ދުރުކުރުމުންނެވެ. އެމްޑީޕީގައި ހުންނެވި ސިރާޖް ފަހުން ޕީޕީއެމްއަށް ސޮއިކުރެއްވި އެވެ. މުހައްމަދު ސިރާޖް މަގާމުން ދުރުކުރެއްވީ، ވިދިވިދިގެން ހަތް ޖަލްސާއަށް ހާޒިރުވެފައިނުވާތީ އެވެ.
ސަރުކާރު ހިންގާ ފީއެންސީއަށް ނިސްބަތްވެވަޑައިގަންނަވާ މުހައްމަދު ވަހީދު މީގެ ކުރިން ހުންނެވީ އަތޮޅު ކައުންސިލްގެ ނައިބު ރައީސްގެ މަގާމުގަ އެވެ. އަދި އޭނާއަކީ ހިރިމަރަދޫ ކައުންސިލްގެ ރައީސްވެސްމެ އެވެ.
މީގެ އިތުރުން ހދ އަތޮޅު ކައުންސިލްގެ ނައިބު ރައީސްގެ މަގާމަށް، ކުރިނބީ ކައުންސިލްގެ ރައީސް އަބުދުﷲ އަސްލަމް ވނީ އިންތިހާބުވެފައެވެ. މިއީ މި ދައުރުގައި އެ ކައުންސިލްގެ ނައިބު ރައީސްގެ މަގާމަށް އިންތިހާބުކުރެވުނު 4 ވަނަ ބޭފުޅާ އެވެ. އަސްލަމަކީ ޕީއެންސީއަށް ނިސްބަތްވެވަޑައިގަންނަވާ ބޭފުޅެކެވެ.
