ދެ މައްސަލައެއްގައި ރައީސް ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވީ، 2021 ވަނަ އަހަރުގެ ފަހުކޮޅުއެވެ. އެއީ، ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރައްވައި، އެ ފައިސާ ލޯންޑާ ކުރެއްވި ކަމަށް ބުނެ އެވެ.
އެ މައްސަލައިގައި ދަށު ކޯޓުން އިއްވި ހުކުމް ހައުކޯޓުން ބާތިލުކޮށް، އެ މައްސަލަ އަލުން ބަލަން އެންގިއެވެ. އެ މައްސަލަ އަލުން ބަލާއިރު، ޔާމީނާ ދެކޮޅަށް ދައުލަތުން ފަހުން ހުށަހެޅި އާ ހެކިތައް ބަލައިނުގަނެވޭނެ ކަމަށް ހައި ކޯޓުން އޭރު އޮތީ ކަނޑައަޅައިފަ އެވެ.
އާ ހެކިތައް ބަލައިގަނެވޭނެ ކަމަށް ބުނެ ދައުލަތުން ސުޕްރީމް ކޯޓަށް ހުށަހެޅި މައްސަލާގައި މިއަދު ބޭއްވި ފަހު އަޑުއެހުމުގައި ވާހަކަ ދައްކަވަމުން ދައުލަތުގެ ވަކީލް އާ ހެކިތަކެއް ހުށަހަޅަން ޖެހުނު ސަަބަބަކީ ހެކިވެރިއެއް ސީދާ ކަނޑައެޅިގެން ދޮގު ހެދިކަން އެނގި ހުރެ، އެކަން ސާބިތު ކުރަން ބޭނުންވާތީ ކަމަށެވެ. އަދި އެ ހެކިތައް އެއްފަރާތްކުރުން ވާނީ ބޮޑު ނާއިންސާފަކަށްކަމަށްވެސް ދައުލަތުގެ ވަކީލްް ވިދާޅުވިއެވެ.
މި މައްސަލައިގެ އަޑުއެހުންތައް ސުޕްރީމް ކޯޓުން މިއަދު ވަނީ ނިންމާލަފައެވެ. ދެން އޮންނާނީ މި މައްސަލައިގައި ގޮތެއް ކަނޑައެޅުމުގެ އަޑުއެހުންކަމަށް މައްސަލަ ބެއްލެވި ފަނޑިޔާރުންގެ ބެންޗުން އިއުލާންކުރިއެވެ.
މި މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައި ގަންނަވަނީ ފަނޑިޔާރު އާއިޝާ ޝުޖޫން މުހައްމަދު، ފަނޑިޔާރު ޑރ. އަޒްމިރާލްދާ ޒާހިރު، އަދި ފަނޑިޔާރު ޑރ. މުހައްމަދު އިބްރާހީމް އެވެ.
