ބައެއް މިނިސްޓަރުން ރައީސް މުހައްމަދު މުއިއްޒާއާ ގާތްވެގެން މަގާމުގައި ދެމިތިބެވޭނެ ކަމަށް ދެކެވަޑައިގަންނަވާ ކަމަށާއި، ނަމަވެސް އެއީ ކުށް ހީއެއް ކަމަށް ދިއްދޫ ދާއިރާގެ މެންބަރު އަބްދުއްލަތީފް މުހައްމަދު ވިދާޅުވެއްޖެއެވެ.
Advertisement
މަޖިލީހުގެ ދައުރުން ބޭރުގައި ބޭއްވި ޖަލްސާއެއްގައި ވާހަކަދައްކަވަމުން ލަތީފް ވިދާޅުވީ މިނިސްޓަރުން ރައްޔިތުންނަށް އިހުމާލުވަމުންދާ ކަމަށެވެ. އަދި ގިނަ މިނިސްޓަރުން ފޯނަށް ޖަވާބު ނުދެއްވާ ކަމަށާއި ރައްޔިތުންނަށް ފިލައިގެން އުޅުއްވާ ކަމަށް ވެސް އޭނާ ތުހުމަތުކުރެއްވިއެވެ.
ލަތީފް ވިދާޅުވީ "މިނިސްޓަރުން ރައީސުލްޖުމްހޫރިއްޔާއަށް ވެސް އިހުލާސްތެރިކަމާއެކު މަސައްކަތް ކުރައްވާކަން ކަށަވަރެއް ނޫން،" ކަމަށެވެ. އަދި މަޖިލީހުގެ މެންބަރުން ބޭނުންފުޅުވެއްޖެ ނަމަ މިނިސްޓަރުން މަގާމުން ވަކިކުރެވޭނެ ކަމަށް ވެސް އޭނާ ހަނދާންކޮށްދެއްވިއެވެ.
މަޖިލީހުގެ މެންބަރުންނަކީ ސަރުކާރާއި ރައްޔިތުން ގުޅުވައިދޭ ފަރާތްތައް ކަމަށާއި މިނިސްޓަރުން މެންބަރުންނާ ގުޅުން ކަނޑާލައިފިނަމަ އޭގެ ނަތީޖާ ރަނގަޅު ނުވާނެ ކަމަށް ވެސް ލަތީފް ވިދާޅުވިއެވެ.
