ޗައިނާއާއެކު ހަދާފައިވާ ފްރީ ޓްރޭޑް އެގްރިމެންޓަށް އަމަލު ކުރަން ފެށީ މިއަހަރުގެ ފުރަތަމަ ދުވަހުން ފެށިގެންނެވެ.
ކަސްޓަމްސްއިން ބުނީ ރާއްޖެއިން ޗައިނާއާއި އެކު ސޮއިކޮށްފައިވާ މިނިވަން ވިޔަފާރީގެ އެއްބަސްވުމުގެ ދަށުން މިހާތަނަށް ޖުމްލަ 1.9 މިލިއަން ރުފިޔާގެ މުދާ ކްލިއާ ކޮށްފައިވާކަމަށެވެ. އޭގެތެރޭގައި ހިމެނެނީ ވައިގެ މަގުން އެތެރެކުރި ނުވަ ސިޕްމެންޓާއި ކަނޑުމަގުން އެތެރެކުރި ތިން ޝިޕްމަންޓްކަމަށް ކަސްޓަމްސް އިން ބުނެއެވެ.
ވައިގެ މަގުން އެތެރެކުރި މުދަލުގެ ސީ.އައި.އެފް އަގަށް 882،381 ރުފިޔާ އަރާކަމަށެވެ. އަދި ކަނޑުމަގުން އެތެރެކުރި މުދަލުގެ ސީ.އައި.އެފް އަގަށް 1.040،875 ރުފިޔާ އަރާކަމަށެވެ.
ރާއްޖެއިން ޗައިނާއާއި އެކު ސޮއިކޮށްފައިވާ މިނިވަން ވިޔަފާރީގެ އެއްބަސްވުމުގެ ދަށުން އެއް ބިލިއަން ޑޮލަރުގެ ވިޔަފާރިކުރެވޭނެކަމަށް ސަރުކާރުން ވަނީ ބުނެފައެވެ. އަދި މި އެއްބަސްވުމުގެ ދަށުން 91 އިންސައްތަ މުދަލުން ޑިއުޓި ނުގާނެކަމަށް އިގްތިސާދާއި ބެހޭ ވަޒީރު މުހައްމަދު ސައީދު ވަނީ ވިދާޅުވެފައެވެ.
އަދި މި އެއްބަސްވުމުގެ ދަށުން ޗައިނާ ގަންނަ އެއްޗިއްސަށް ފައިސާ ދައްކަންޖެހޭނީ ދިވެހި ރުފިޔާއިންކަން ފާހަގަކުރައްވަމުން ވަޒީރު ސައީދު ވިދާޅުވީ މިކަމުން ދިވެހި ވިޔަފާރިތަކަށްް ބޮޑަތަނުން ލުއިވެ ފަސޭހަތައް ލިބިގެންދާނެކަމަށެވެ. އަދި މި ކަމުގައި ސަބަބުން ރާއްޖޭގެ އޮތް ޑޮލަރުގެ ތާށިކަމަށްް ހައްލު ލިބިގެންދާނެކަމަށްވެސް ވަޒީރު ސައީދު ވަނީ ވިދާޅުވެފައެވެ.
