އަންނަ ރޯދަމަހު ދިވެހި ކޮންމެ ގޭބިސީއަކަށް މަސްދަޅު ކޭހެއް ސަރުކާރުން ހިލޭ ދޭން ނިންމާ އެކަން ރައީސް ޑރ. މުހައްމަދު މުއިއްޒު އިއުލާންކުރެއްވީ މި ސަރުކާރަށް އެއް އަހަރު ފުރުމުގެ މުސާސަބަތުގައި ބޭއްވި ޖަލްސާގައި ވާހަކަ ދައްކަވަމުންނެވެ.
މިފްކޯއިން ބުނީ ކޮންމެ ގޭބިސީއަކަށް ދޭން ނިންމާފައިވަނީ 48 ދަޅުގެ މަސްކޭހެއްކަމަށެވެ.
ސީއެންއެމާއި ވާހަކަ ދައްކަވަމުން މިފްކޯގެ މީޑިއާ އޮފިޝަލް އިބްރާހިމް ސައީދު ވިދާޅުވީ އަންނަ ރޯދަމަހު ސަރުކާރުން ދޭ މަސްދަޅު ބެހުމުގެ ކަންކަން ކުރިޔަށް ގެންދަނީ މިފްކޯއާ އެސްޓީއޯ ގުޅިގެންކަމަށެވެ.
ރޯދަ މަހު 82 ހާސް ގޭބިސީއަކަށް މަސްދަޅު ކޭސް ބެހުމަށް ހަމަޖެހިފައިވާކަމަށާއި ގޭބިސީތަކަށް ބޭނުންވާ މަސްދަޅު ކޭސްތަކުގެ ފައިނަލް ސްޓޮކްގެ މަސައްކަތް ނިންމާ މަހެއްހާ ދުވަހުގެ ތެރޭގައި އެސްޓީއޯއާއި ހަވާލު ކުރާނެކަމަށްވެސް އިބްރާހިމް ސައީދު ވިދާޅުވިއެވެ.
ސައީދު ވިދާޅުވީ މިހާރު ހުރި ހިސާބުތަކުން 82 ހާސް ގެބީސީއަކަށް މަސްދަޅު ބަހަން ޖެހުނު ނަމަވެސް މަސްދަޅު ކޭސް އުފައްދަނީ އެ އަދަދު އިތުރުވެދާނެކަމަށް ބަލައިގެންކަމަށެވެ.
ކޮންމެ ގޭބިސީއަކަށް 48 ދަޅުގެ މަސްކޭހެއް ހިލޭ ދިނުމަށް 46 މިލިއަން ރުފިޔާ ހޭދަވާނެއެވެ.
މި ސަރުކާރަށް އެއް އަހަރު ފުރުމުގެ ޖަލްސާގައި ވާހަކަ ދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ ސަރުކާރުން ދިން ފުރަތަމަ ޑިސްކައުންޓެއްގެ ގޮތުން މިދިޔަ ރޯދަމަހު ސަރުކާރުން ކަރަންޓް ބިލުން ޑިކްސްކައުންޓް ދީފައިކަމަށެވެ. އެގޮތުން ކަރަންޓް ބިލުން މިދިޔަ ރޯދަމަހު 142 މިލިއަން ރުފިޔާގެ ޑިސްކައުންޓް ދީފައިވާކަަމަށެވެ. މީގެއިތުރުން މިދިޔަ ރޯދަމަހު 82،000 ގޭބިސީއަކަށް 1.6 މިލިއަން ކިލޯގެ ކާޑު ދޫކޮށްފައިވާކަމަށް ރައީސް މުއިއްޒު ވިދާޅުވިއެވެ.
