މި ގަރާރު މަޖިލިހަށް ހުށައެޅުއްވީ އެމްޑީޕީ މެމްބަރު ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމް (ކުޑޫ) އެވެ.
އެ ގަރާރުގައި ބުނެފައިވަނީ ވިހެއުމުން ލިބޭ ހަ މަސްދުވަހުގެ ޗުއްޓީގެ މުއްދަތުގެ ތެރޭގައި ދަރިފުޅު ނިޔާވުމުން އަނބުރާ ވަޒީފާއަށް ނުކުތުމަށް ސަރުކާރުގެ ދެ އިދާރާއަކުން އެންގުމުން އާންމުންގެ ޝަކުވާތައް އިންތިހާއަށް ލިބެމުންދާ ކަމަށެވެ. މި މައްސަލައަށް އަވަސް ހައްލެއް ހޯދައިދިނުމަކީ ރައްޔިތުންގެ މަޖިލީހަށް އޮތް ޒިންމާއެއް ކަމުގައި ދެކޭ ކަމަށް ކުޑޫ ހުށައެޅި ގަރާރުގައިވެއެވެ.
މުވައްޒަފަކު ވިހެއުމުން ޗުއްޓީގައި ހުއްޓާ ދަރިފުޅު މަރުވެއްޖެނަމަ، މުވައްޒަފެއްގެ އިތުރު ޗުއްޓީއެއް ނެތި އަނެއް ދުވަހު ވަޒީފާއަށް ނިކުންނަން ޖެހުމަކީ މުވައްޒަފާއި އާއިލާއަށް އިތުރު ހިތްދަތިކަމާއި ތަކުލީފު އުފުލަން ޖެހޭނެ ކަމެއް ކަން ކުޑޫގެ ގަރާރުގައި ފާހަގަކޮށްފައިވެއެވެ. އެހެންކަމުން އެކަމަށް މަޖިލީހުން ހައްލެއް ހޯދައިދިނުމަށް އޭނާ ވަނީ އެދިވަޑައިގެންފައެވެ.
ވިހެއުމުން މުސާރައާ އެކު، ހަ މަސްދުވަހުގެ ޗުއްޓީ ލީބޭ ގޮތަށް ސިވިލް ސާވިސްގެ ގަވާއިދަށް ބަދަލު ގެނެސް އަމަލުކުރަން ފެށީ 2019 ވަނަ އަހަރުގެ މާޗު މަހުން ފެށިގެންނެވެ. އޭގެ ކުރިން ވިހެއުމުން ލިބެނީ ތިން މަސް ދުވަހުގެ ޗުއްޓީއެކެވެ.
