ދުނިޔޭގެ ފެންވަރުގެ ފުޓްބޯޅަ ދަނޑެއް ރ. އަތޮޅުގައި ތަރައްގީކޮށްދެއްވާނެކަމަށް ރައީސް ވިދާޅުވީ، ރ. އަތޮޅަށް ރައީސުލްޖުމްހޫރިއްޔާ ކުރައްވަމުން ގެންދަވާ ދަތުރުފުޅުގެ ތެރެއިން ރ. އުނގޫފާރު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
އުނގޫފާރުގައި ވާހަކަފުޅު ދައްކަވަމުން ރައީސް ވިދާޅުވީ އެމަނިކުފާނުގެ ރިޔާސީ ވައުދުފުޅާއި އެއްގޮތަށް ރ. އަތޮޅުގައި ފީފާ ފެންވަރުގެ ފުޓްބޯޅަ ދަނޑެއް އެޅުމަށް ކުޅިވަރާއި ބެހޭ ވަޒީރު ރ. އަތޮޅު ކައުންސިލާއެކު އެކަމާ ގުޅޭ މަޝްވަރާތައް ކުރައްވާފައިވާ ކަމަށެވެ. އަދި އުނގޫފާރުގައި ކުޅިވަރުގެ އިތުރު ވަސީލަތްތައްވެސް ގާއިމު ކޮށްދެއްވާނެކަމުގެ ޔަގީންކަން އެރަށުގެ ރައްޔިތުންނަށް ރައީސް ދެއްވިއެވެ.
ރ. އަތޮޅަށް ކުރައްވަމުން ގެންދަވާ ދަތުރުފުޅުގައި އަނގޮޅިތީމުގެ ރައްޔިތުންނާ ބައްދަލު ކުރައްވާ ރައީސް ވިދާޅުވީ ގިނަ ރަށްތަކެއްގައި ފުޓްސަލް ދަނޑާއި، ފުޓުބޯޅަދަނޑުތަކާއި ވޮލީ ކޯޓުތައް ފަށާ ނުނިމިފައި ނުވަތަ މަރާތުކުރުމުގެ މަސައްކަތް ހިނގަމުންދާ ކަމަށާއި، ކުރިޔަށް އޮތް ދެ އަހަރުގެ ތެރޭގައި އެތަންތަން ނިންމަވާ ދެއްވުމަށް އިސްކަން ދެއްވާނެ ކަމަށެވެ. އަދި އަންހެނުންނަށް ހާއްސަ ހޭންޑް ބޯޅަ ކޯޓެއް އަނގޮޅިތީމުގައި އަޅުއްވައިދެއްވާނެކަމަށް ރައީސް ވިދާޅުވިއެވެ.
