ހޭންޑްބޯލްއަކީ ރާއްޖޭގައި މިހާރު ވަރަށް ބޮޑަށް ކުރިއަރަމުން އަންނަ ކުޅިވަރެއްކަން ފާހަގަ ކުރައްވައި، މުޅި ރާއްޖެއަށް ހޭންޑްބޯލްގެ ފުލް ޕްލޭނެއް ހަދަން މިނިސްޓަރަށް އިރުޝާދު ދެއްވި ކަމަށް ރައީސް ވިދާޅުވީ، މާޅޮސްމަޑުލު އުތުރުބުރީގެ ބައެއް ރަށްތަކަށް ކުރެއްވި ދަތުރުފުޅުގައި އެ އަތޮޅު ކިނޮޅަހުގައި ވާހަކަ ދައްކަވަމުންނެވެ.
މުޅި ރާއްޖޭގައި ހޭންޑްބޯލްގެ މަގުބޫލުކަން އިތުރުވަމުން އަންނަކަން ރައީސް މިއަދު ފާހަގަ ކުރެއްވިއިރު، އިންޓަރ ސްކޫލް ހޭންޑްބޯޅަ މުބާރާތް މި އަހަރު ބާއްވާނީ ހަތަރު ސަރަހައްދަކަށް ބަހާލައިގެން ކަމަށް ހޭންޑްބޯލް މޯލްޑިވްސުންވަނީ ބުނެފައެވެ. ހޭންޑްބޯލް އެސޯސިއޭޝަނުން ވިސްނާފައި އޮތީ، މި އަހަރު މުބާރާތް ބާއްވާއިރު މާލޭ ސަރަހައްދު އެއީ ވަކި ބައެއް ގޮތަށް ކުރިއަށްގެންދިޔުމަށެވެ.
އަދި ސެންޓްރަލް އޭރިއާގައި ވަކިން އިންޓަރ ސްކޫލް މުބާރާތް ކުރިއަށްގެންދާއިރު، އުތުރާއި ދެކުނުގެ ސަރަހައްދަށްވެސް ވަކިން މުބާރާތް ބޭއްވުމަކީ ހޭންޑްބޯލް މޯލްޑިވްސްގެ ވިސްނުމެވެ.
