އިއްޔެގެ ވަގުތެއްގައި ފުނަދޫ ކައުންސިލުން ކުރި ފޭސްބުކް ޕޯސްޓެއްގައި ބުނީ އެރަށު އުތުރުކޮޅު ކުޑަމިސްކިތް ( މަސްޖިދުލް ގުފްރާން) އިން ގަބުރު ކަށިތަކެއް ފެނިފައިވާތީ މިސްކިތުގައި ނަމާދުކުރުން މެދު ކަނޑާލާފައިވާކަމަށެވެ.
އެގޮތުން އެ ކަމަށް އަވަސް ހައްލެެއް ހޯދުމަށް ކައުންސިލުން މަސައްކަތް ކުރަމުންދާކަމަށް އެ ޕޯސްޓްގައި ފާހަގަކުރެއެވެ.
"ސީއެންއެމް" އަށް މައުލޫމާތު ދެމުން ފުނަދޫ ކައުންސިލް ރައީސް އަހުމަދު އިބްރާހީމް ފުޅު ވިދާޅުވީ ފުނަދޫ ރައްޔިތުންގެ ހިތްތަކުގައި އެ މިސްކިތުގައި ގަބުރު ކަށިތަކެއް ހުރެދާނެކަމުގެ ޝައްކު އޮންނަތާ އެތަކެއް ދުވަސްތަކެއް ވެފައިވާ ކަމަށެވެ. އެގޮތުން ފުނަދޫ ކައުންސިލްއަށް ޝަކުވާތަށް އަންނަލެއް ގިނަކަމުން ކައުންސިލްގެ ފަރާތުން އެކަން ބެލުމަށްޓަކއި ގޮސް މިސްކިތުން ސަރަހައްދެއް ކޮނުނު ކަމަށް ކައުންސިލް ރައީސް ވިދާޅުވިއެވެ.
ކައުންސިލް ރައީސް ވިދާޅުވީ މިސްކިތު ފެންޑާތެރެއިން ކޮނުނީ 3 ފޫޓު އަދި 6 ފޫޓާ ދެމެދުގެ ސަރަހައްދެއްކަަމަަށެވެ. އަދި އެތަނުން ކަބުރު ކަށިތައް ފެނިފައި ވާކަމަށް ވިދާޅުވިއެވެ. އޭނާ އިތުރަށް ވިދާޅުވީ އެއީ ވަރަށް ގިނަ ދުވަސްވެފައި ހުރި ކަށިތަކެއް ކަމަށާއި އެއަށް ވީ އަހަރުވެސް އަންދާޒާ ނުކުރެވޭކަމަށެވެ.
ކަށިތައް މިހާރުވީ ގަބުރުސްތާނަށް ގެންގޮސް ވަޅުލާފައި ކަމަށާއި ކައުންސިލުން އިތުރަށް ކޮންނަން ނުވިސްނާކަމަށް ކައުންސިލް ރައީސް ވިދާޅުވިއެވެ. އަދި އެ ކަމާމެދު ދެން ގޮތެއް ނިންމާނީ އިސްލާމިކް މިނިސްޓްރީން ކަމަށް ކައުންސިލް ރައީސް ވިދާޅުވިއެވެ.
ފުނަދޫއިން މީގެކުރިންވެސް ވަނީ ގަބުރު ކަށި ހޯދާފައެވެ. އެރަށުގައި މީގެ ކުރިން ބަޔަކު އާބާދުވެ ދިރިއުޅެފައިވާކަން ބެލެވޭ ކަމަށް ބައެއް މީހުން ބުނެއެވެ.
