ސީޕީ މިކަމަށް އެދިވަޑައިގަތީ ފުލުހުންގެ 38 ވަނަ ޕޮލިސް އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
ފުލުހުންގެ ހިދުމަތަށް އަލަށް ގުޅުނު އޮފިސަރުންނާ މުހާތަބުކޮށް ވާހަކަފުޅު ދައްކަވަމުން ސީޕީ ވިދާޅުވީ ރައްޔިތުންގެ ފަރާތުން އަންނަ އެއް ޝަކުވާއަކީ ފުލުހުން މަގުމަތީ ޑިއުޓީގައި ތިބޭއިރު ފޯނާ ކުޅެންތިބޭ ތަން ފެންނަ ކަމުގެ ޝަކުވާ ކަމަށެވެ.
އެހެންކަމުން މިކަން ރަނގަޅުކުރަންޖެހޭކަން ފާހަގަކުރައްވާ ސީޕީ އަލީ ސުޖާއު ވަނީ ހިދުމަތުގައި ތިބޭ ފުލުހުންނަކީ ރައްޔިތުންނަށް ހާއްސަވެގެން ތިބޭ ބަޔަކަށްވުމަށް އެދިވަޑައިގެންފައެވެ.
ފުލުހުންނަށް ލިބިފައިވާ ގާނޫނީ ބާރުތަކަކީ ހިތުހުރި ގޮތަކަށް ބޭނުންކުރަންޖެހޭ ބާރުތަކެއް ނޫން ކަމަށާއި އަބަދުވެސް މަސައްކަތް ކުރަންވާނީ ބާރުގެ ބޭނުންނުކޮށް ދިމާވާ ކަންކަން ހައްލުކުރުމަށް ކަމަށްވެސް ކޮމިޝަނާ އޮފް ޕޮލިސް ވިދާޅުވިއެވެ.
ފުލުހުން އަބަދުވެސް މަސައްކަތް ކުރަންވާނީ މަގު ދައްކައިދީ އަދި އިސްލާހުވުމަށް ފުރުސަތުދޭ ބަޔަކަށް ކަމަށް ސީޕީ ވިދާޅުވިއެވެ.
މީގެ އިތުރުން ސީޕީ ވަނީ ފުލުހުންގެ ހިދުމަތުގެ ފެންވަރު ރަނގަޅުކޮށް، ފުޅާކުރުމަށް ވަރަށް ގިނަ މަސައްކަތްތަކެއް ކުރައްވާކަން ފާހަގަކުރައްވާފައެވެ.
އެގޮތުން ފުލުހުންނަށް ބޭނުންވާ ތަމްރީނުތައް ރާއްޖެ އަދި ރާއްޖެއިން ބޭރުން ލިބޭ ކަމަށާއި ފުލުހުންގެ މަރުކަޒުތައް ގާއިމްކުރުމުގެ މަސައްކަތް މިހާރު ވަނީ ފަށާފައި ކަމަށްވެސް ސީޕީގެ ވާހަކަފުޅުގައި ވިދާޅުވިއެވެ.
ކޮމިޝަނާ އޮފް ޕޮލިސްގެ ވާހަކަފުޅު ނިންމަވާލެއްވީ ފުލުހުންނަށް ބޭނުންވާ ވަސީލަތްތައް ހޯއްދަވައިދެއްވުމަށް ރައީސް ޑރ. މުހައްމަދު މުއިއްޒު ކުރައްވާ މަސައްކަތްޕުޅު ފާހަގަކުރައްވާ އެމަނިކުފާނަށް ޝުކުރުއަދާކުރައްވަމުންނެވެ.އަދި ފުލުހުންގެ މަސައްކަތްތަކަށް މިނިސްޓަރު އިހުސާން ބަހައްޓަވާ ގާތްކަމަށްޓަކައި އެމަނިކުފާނަށްވެސް ސީޕީ ވަނީ ޝުކުރުއަދާކުރައްވާފައެވެ.
