މި މަގާމަށް ހޮވޭ ފަރާތުގެ މައިގަނޑު މަސްއޫލިއްޔަތުތަކުގެ ތެރޭގައި ދިގު މުއްދަތުގެ ތަރައްގީގެ ޕްލޭން އެކުލަވާލުމުގެ އެންމެހައި މަސައްކަތްތައް އިސްކޮށް ހިންގުމާއި ކޯޑިނޭޓްކުރުން ހިމެނެއެވެ. މި ޕްލޭނަކީ ކުރިއަށް އޮތް 20 އަހަރު ދުވަހުގެ ތެރޭގައި ދިވެހިރާއްޖޭގެ އިގްތިސާދީ، އިޖްތިމާއީ، ތިމާވެށި އަދި އާބަން ޑިވެލޮޕްމަންޓް ދާއިރާތަކުގެ ދެމެހެއްޓެނިވި ތަރައްގީއަށް އަމާޒުކޮށް އެކުލަވާލެވޭ ޕްލޭނެކެވެ.
މިނިސްޓްރީން މި މަގާމަށް ކުރިމަތިލާން ޝައުގުވެރިވާ ފަރާތްތަކަށް މި މަހުގެ 30 ވަނަ ދުވަހުގެ މެންދުރުފަހު 1:00 ގެ ކުރިން "އެކްސްޕްރެޝަން އޮފް އިންޓަރެސްޓް" ހުށަހެޅުމަށް ދައުވަތު ދީފައިވެއެވެ. އަދި މި މަސައްކަތާ ގުޅޭ އިތުރު މައުލޫމާތު މިނިސްޓްރީގެ ވެބްސައިޓުން ލިބެން ހުންނާނެކަމަށް ބުނެފައިވެއެވެ.
މި މަސައްކަތް ފުރިހަމަކުރުމަށްޓަކައި މިނިސްޓްރީން ވަނީ ލޯކަލް ކޮންސަލްޓެންސީ ފާމެއް ހޯދުމަށްވެސް ވަކިން އިއުލާންކޮށްފައެވެ. މިއީ ރާއްޖޭގެ ތަރައްގީގެ މަސައްކަތްތައް ހަރުދަނާ އުސޫލަކުން ކުރިއަށް ގެންދިއުމަށް އެޅޭ މުހިންމު ފިޔަވަޅެކެވެ.
