މީޑިއާ އަށް ވާހަކަދައްކަވަމުން ޑިމޮކްރެޓްސްގެ ވަގުތީ ރައިސް ހުސެއިން ފިރުޝާން މިއަދު ވިދާޅުވީ ފުލުހުންނަށް މައްސަަލަ ހުށަހާޅާފައި ވަނީ ޑީއެންއާރުގެ ޑޭޓާ ބޭނުންކޮށްގެން ޕާޓިތަކަށް މީހުން ވައްދާތީ އަދި ޑިމޮކްރެޓްސް ތެރެއިންވެސް އެކަން ފާހަގަކުރެވިފައިވާތީ ކަމަށެވެ.
މި މައްސަލާގައި މިހާރު ވާނީ ޕާޓިން ބަދަލު ކުރެވުނު ފަރާތްތަކުގެ މައުލޫމާތާއެއްކޮށް މައްސަލަ ބަލައިދީ ޖިނާއީ ތަހުގީގެއް ހިންގައި ދިނުމަށް ހުށަހެޅިފައިކަން ފިރުޝާން ވިދާޅުވިއެވެ. އަދި ފުލުހުން ވަނީ އެ މައްސަލ ކުރިއަށް ގެންދާނެކަމަށްވެސް ބުނެފައިކަން އޭނާ ފާހަގަކުރެއެވެ.
ފުރަތަމަ އެކަން އެގިފައިވަނީ އިލެކްޝަން އިން ފޯރުކޮށްދޭ ޑޭޓާއަށް ބަލާފައި ކަމަށް ފިރުޝާން ވިދާޅުވިއެވެ. އޭގެން ފާހަގކުރެވުނީ އޮގަސްޓް މަހުން ފެށިގެން ގަނޑުކޮށް މެމްބަރުން ބަދަލުކުރަމުން ދާތަން ކަމަށާއި އަދި މެމްބަރުންނަށް ގުޅާގެން މައުލޫމާތު ބަލާލިއިރު އެކަން ހިނގީ އެ ފަރާތަަކަށް އެނގިގެންނެއް ނޫން ކަމަށް ބުނެފައިވާކަން ފިރުޝާން ވިދާޅުވިއެވެ.
ހާއްސަގޮތެއްގައި ހޯމް މިނިސްޓަރު އަލީ އިހުސާން އެތަނުގައި ހާޒިރުވެހުރެ އެކަމެެއް ހިނގާއިރު އެއީ ރައްޔިތުން ވަރަށް ބޮޑަށް ކަންބޮޑުވާން ޖެހޭ ކަމެއް ކަަމަށާއި އެއީ ފިޔަވަޅުވެސް އަޅަން ޖެހޭ ކަމެއް ކަމަށް ފިރުޝާން ވިދާލުވިއެވެ. އަދި ކުށެގެ ވެށީގައި މިނިސްޓާ ހުންނަވާއިގެން އެކަމެއް ހިންގީމާ އެއީ ބަަލައިގަނެވޭނެ ކަމެއް ނޫން ކަމަށްވެސް ފިރުޝާން ކަންބޮޑުވުމާއެކު ފާހަގަކުރެއްވިއެވެ.
ޕީއެންސީ އަށް މީހުން ވެއްދުމަށް ފޯމުތަކެއް ސަރުކާރުގެ އޮފީހެއްގެ ތެރޭގައި ފުރާ މަންޒަރު ފެންނަ ފޮޓޯތަކެއް ސޯޝަލް މީޑީއާގައި ވަނީ އާއްމުވެފައެވެ. އެ ފޮޓޯތަކުން އެތަނުގައި ހޯމް މިނިސްޓަރު އަލީ އިހްސާނާއި އެ މިނިސްޓްރީގެ ޑެޕިއުޓީ މިނިސްޓަރު އަދި ޑީއެންއާރު ހިންގުމާ ހަވާލުވެ ހުންނެވި އަހްމަދު އާލީގެ އިތުރުން ސްޓޭޓް މިނިސްޓަރު އަބްދުލް މަޖީދު އިބްރާހިމް އިންނަވައެވެ. އަދި ޕީއެންސީއަށް ފޯމުތައް ފުރާއިރު ޕާސްޕޯޓު ސައިޒު ފޮޓޯތަކެއް ޕްރިންޓް ނަގާ ކަފާ މަންޒަރުވެސް ފެނެެއެވެ.
އެކަމުގައި ސަރުކާރަށް ފާޑުކިޔުންތައް އަމާޒުވެފައި ވަނިކޮށް ޑީއެންއާރުގެ މަސައްކަތް ހިނގާ ގޮތް ދައްކާލަން ކަމަށް ބުނެ އެ އިދާރާއަށް މިއަދު ވަނީ ނޫސްވެރިން ގެންގޮސްފައެވެ. އެ އިދާރާއަށް ނޫސްވެރިން ގެން ގޮސް ފުރަތަމަ ދައްކާލީ އެ ފޯމުތައް ފުރިކަމަށް ބުނާ މީޓިން ރޫމެވެ.
އޭގެ ފަހުން އެ އިދާރާގެ ދޮރުމަތީގައި ނޫސްވެރިންގެ ބައްދަލުވުމެއް ވަނީ ބާއްވާފައެވެ. އެ ބައްދަލވުމުގައި ނޫސްވެރިން ސުވާލުތައް އަމާޒު ކުރީ އެ ފޯމުތައް ފުރީ ކޮންތާކުތޯ އަހާ އޮޅުން ފިލުވުމަށެވެ. މި ސުވާލުތަކަށް ޖަވާބު ދެއްވަމުން ހޯމް މިނިސްޓްރީގެ ސްޓޭޓް މިނިސްޓަރު އަބްދުލް މަޖީދު އިބްރާހިމް ވަނީ އެ ފޯމުތައް ފުރީ ޑީއެންއާރުގެ އޮފީހުގެ ތެރޭގައިކަމަށް އިއުތިރާފުވެފައެވެ.
