ފިނޭންސް މިނިސްޓްރީގެ ވީކްލީ ފިޒްކަލް ޑިވެލޮޕްމަންޓް ރިޕޯޓް ދައްކާ ގޮތުން މި އަހަރުގެ ޖެނުއަރީ 1 އިން 16 ވަނަ ދުވަހުގެ ނިޔަލަށް ދައުލަތަށް އާމްދަނީގެ ގޮތުގައި ލިބުނީ 725 މިލިއަން ރުފިޔާ އެވެ.
ލޯނުތައް ދެއްކުމަށް ކުރި ހޭދައާއެކު މި މުއްދަތުގައި ހަރަދުކުރީ 430.5 މިލިއަން ރުފިޔާ އެވެ.
ހަރަދުގެ ތެރެއިން 261 މިލިއަން ރުފިޔާ ހޭދަކުރީ ރިކަރަންޓް ހަރަދުގެ ގޮތުގަ އެވެ. މީގެ ތެރެއިން 256.6 މިލިއަން ރުފިޔާ ހޭދަކުރީ އިދާރީ އަދި ހިންގުމުގެ ހަރަދުގެ ގޮތުގަ އެވެ.
މުސާރަ އާއި ޕެންޝަނަށް މި މުއްދަތުގައި 4.4 މިލިއަން ރުފިޔާ ހޭދަކުރި ކަމަށް ފިނޭންސްގެ ތަފާސްހިސާބުތަކުން ދައްކަ އެވެ.
ލޯނުތައް ދެއްކުމަށް 122 މިލިއަން ރުފިޔާ ހަރަދުކޮށްފައިވެ އެވެ.
ފިނޭންސްގެ ތަފާސްހިސާބުތަކަށް ބަލާއިރު މި އަހަރާއި އަޅާބަލާއިރު މިދިޔަ އަހަރުގެ މި މުއްދަތުގައި ހަރަދާއި އާމްދަނީވެސް އިތުރެވެ.
އެ ގޮތުން ލޯނާއެކު މިދިޔަ އަހަރުގެ މި މުއްދަތުގައި ކުރި ހަރަދު 1.1 ބިިލިއަން ރުފިޔާއަށް އަރަ އެވެ. އާމްދަނީގެ ގޮތުގައި މިދިޔަ އަހަރުގެ މި މުއްދަތުގައި 856.5 މިލިއަން ރުފިޔާ ލިބުނެވެ.
