ޓްއަރިޒަމް މިނިސްޓަރުކަމުން ފައިސަލް ވަކިކުރިކަން ރައީސް އޮފީހުން މިއަދު ވަނީ ބުނެފައެވެ. އަދި އެ މިނިސްޓްރީ ހިންގުން ވަގުތީ ގޮތުން އިކޮނޮމިކް މިނިސްޓަރު މުހައްމަދު ސައީދާއި ވަގުތީ ގޮތުން ރައީސް ޑރ. މުހައްމަދު މުއިއްޒު ވަނީ ހަވާލުކުރައްވާފައެވެ. ފައިސަލް މަގާމުން ވަކިކުރި ސަބަބެއް ރައީސް އޮފީހުން ހާމައެއް ނުކުރެއެވެ.
ފައިސަލް ވިދާޅުވީ އެނާ މަގާމުން ވަކިކުރިކަން އަންގާ ރަޢީސް އޮފީހުން ލިޔުން ފޮނުވީ މިއަދުގެ ހެނދުނުގެ ވަގުތެއްގައެވެ. އެހެންނަމަވެސް އެ ލިޔުމުގައިވެސް މަގާމުން ވަކިކުރި ސަބަބެއް ނެތްކަން ފައިސަލް ފާހަގަކުރެއްވިއެވެ.
ފައިސަލް ވިދާޅުވީ އޭނާ ސިޔާސީ ގޮތުން ކުރިޔަށްދާނެ ގޮތެއް އަދި ނުނިންމަވާކަމަށާއި އެހެންނަމަވެސް އެކަމުގައި ގޮތެއް ނިންމަވާނީ ބައްޕާފުޅު އަބްދުއްރަހީމްއާ މަޝްވަރާކުރެެއްވުމަށްފަހުކަމަށެވެ. އެހެންނަމަވެސް ކުރިޔަށް ވުރެ ވަރުގަދަކޮށް ސިޔާސީ މަސައްކަތުގައި އުޅޭތަން ފެންނާނެކަމަށް ފައިސަލް ވިދާޅުވިއެވެ.
ރައީސް މުއިއްޒު ތުރުކީވިލާތަށް ކުރެއްވި ދަތުރުގައި އެމަނިކުފާނުގެ އަރިހުގައި ފައިސަލް
މި ސަރުކާރުގެ ފުރަތަމަ ޓްއަރިޒަމް މިނިސްޓަރުކަމަށް ފައިސަލް އައްޔަންކުރުމުން ސަރުކާރަށް ވަރަށް ބޮޑެތި ފާޑުކިޔުންތައް އަމާޒުވިއެވެ. އަދި ހާއްސަކޮށް ހަފްލާއެއްގައި ދެއްވި ތަގުރީރަކާއި ގުޅިގެން ފާޑުކިޔުންތައް އިތުރުވެގެންދިޔައެވެ.
ކުއްލި ގޮތަކަށް ފައިސަލް މިނިސްޓަރުކަމުން ވަކިކުރައްވާފައި މިވަނީ އޭނާ އެއްވެސް ރަސްމީ ދަތުރެއް ނުކުރުމަށް ރައީސް އޮފީހުން އެންގިކަމަށް މިދިޔަ ހަފްތާގައި އަޑު ފެތުރިފައިވަނިކޮށެވެ. އަދި ރައީސް އެންމެ އިތުބާރުކުރައްވާ އަދި އެމަނިކުފާނުގެ އެންމެ އަރިސްކޮށް ހުންނެވި އަބްދުއްރަހީމް އަބްދުﷲ އާ ހިޔާލު ތަފާތުވުންތަކެއް އުފެދިފައިވާކަމަށްވެސް އަޑު ފެތުރިފައިވަނިކޮށެވެ.
ރައީސް މުއިއްޒު ވެރިކަމަށް ވަޑައިގެން އެންމެ ފުރަތަމަ އަބްދުއްރަހީމް އައްޔަންކުރެއްވީ އެމަނިކުފާނުގެ އެޑްވައިޒަރަކަށެވެ. އެ މަގާމަށް އައްޔަންކުރެއްވީ ސީނިއާ މިނިސްޓާރުން ފެންވަރުގައެވެ. އޭގެ ފަހުން މަޖލިސް އިންތިހާނބުގައި ލިބުނު ސުޕާ މެޖޯރިޓީއާ އެކު އަބްދުއްރަހީމް ވަނީ މަޖިލިހުގެ ރައީސްކަމަށް އައްޔަންކޮށްފައެވެ.
ރައްޔިތުން މަޖލީހުގެ އިންތިހާބުގެ ކެމްޕެއިންގައި ރަޢީސް ޑރ. މުއިއްޒު ވިދާޅުވީ އެމަނިކުފާނު އެންމެ އިތުބާރުކުރައްވާ އަދި އެ ބޭފުޅަކަށްޓަކައު އެންމެ ފަހުރުވެރިވާ ބޭފުޅަކީ އަބްދުއްރަހީމްކަމަށެވެ.
