މިނިސްޓަރު މިހެންވިދާޅުވީ ކެނެޑާ ފަންޑުގެ އެހީގައި، މޯލްޑިވްސް ވެޓްލޭންޑްސް ފައުންޑޭޝަނުން، ކުރިޔަށް ގެންދިޔަ ކަނޑޫފާ ބިންތަކުން އަންހެނުން ކުރަމުން އަންނަ އިގްތިސާދީ މަސައްކަތްތައް ފުޅާކުރުމުގެ ގޮތުން، ބޮނބިން އުފައްދާ ރޯނުން ގަހަނާ ތައްޔާރުކުރުމުގެ ކޯހުގެ ބައިވެރިންގެ ތަކެތި ބައްލަވާލެއްވުމަށްފަހު އެކްސްގައި ކުރެއްވި ޕޯސްޓެއްގައެވެ.
އެ ޕޯސްޓެއްގައި މާރިޔާ ވިދާޅުވީ އަންހެނުންނަށް ބާރުވެރިކަން ދިނުމުގައި މޯލްޑިވްސް ވެޓްލޭންޑް ފައުންޑޭޝަނުން ކުރާ މަސައްކަތަށާއި، އެ މުހިންމު މަސައްކަތަށް އެހީތެރިވެދެއްވާތީ ކެނެޑާ ފަންޑަށް ޝުކުރުވެރިވާކަމަށެވެ. އަދި މިފަދަ މަސައްކަތްތަކެއް ދަސްކޮށްދެއްވާ، ބްރޭޑެއް ތައާރަފް ކުރެވިގެން ދިއުމަކީ ދެމެހެއްޓެނިވި، ގުދުރަތީ ވަސީލަތްތަކުގެ މައްޗަށް ބިނާކޮށްގެން ކުރެވޭ މަސައްކަތްތަކުން އިތުރު ނަފާ ނެރެވޭ ކަމެއްކަމަށް މިނިސްޓާ ފާހަގަކުރެއްވިއެވެ.
ރޭ ބޭއްވި ހަފްލާގައި މިނިސްޓަރު މާރިޔާ ވަނީ ރާއްޖޭގެ ކަނޑޫފާ ބިންތަކުގައި އަންހެނުންގެ އިޖްތިމާއީ އަދި އިގްތިސާދީ ދައުރާ ބެހޭގޮތުން މޯލްޑިވްސް ވެޓްލޭންޑްސް ފައުންޑޭޝަން ގެ ފަރާތުން ތައްޔާރުކޮށްފައިވާ ދިރާސާ، އިފްތިތާހުކޮށްދެއްވާފައެވެ. އަދި އެއަށް ފަހު، ބޮނބިން އުފައްދާ ރޯނުން ގަހަނާ ތައްޔާރުކުރުމުގެ ތަމްރީންގައި ބައިވެރިވި ބައިވެރިންނާއި ބައްދަލު ކުރައްވާ، އެ ފަރާތްތަކުގެ މަސައްކަތްތައް މިނިސްޓާ ބައްލަވާލަވާލެއްވިއެވެ.
