މިއީ، މަކަރާއި ހީލަތުން އޮޅުވާލައިގެން ފައިސާ ހޯދުމުގެ މައްސަލައެއްގައި ތުހުމަތު ކުރެވޭ ދިވެއްސަކަށް ދިވެހި ބަސް ރަނގަޅަށް ނޭނގޭތީ، ކޯޓުގައި ތަރުޖަމާނެއްގެ އެހީތެރިކަން ހޯދަން ޖެހުނު މައްސަލައެކެވެ. މި މައްސަލާގައި ހައްޔަރު ކޮށްފައިވަނީ އުމުރުން 19 އަހަރުގެ ދިވެހި ފިރިހެނެކެވެ.
އެ މައްސަލާގައި ތުހުމަތު ކުރެވޭ މީހާއަށް ދިވެހި ބަސް ފަހުމު ނުވާތީ އިއްޔެގެ އަޑުއެހުން ކުރިއަށް ގެންގޮސްފައިވަނީ ތަރުޖަމާނެއްގެ އެހީގައި ކަމަށް ބަންދު އަމުރުގައިވެ އެވެ. އެ މީހާއަކީ ދިވެހި ބަސް ރަނގަޅަށް ފަހުމް ނުވާ މީހަކަށް ވާތީ، އެކަމުގައި އޭނާ ބައިވެރިނުވާކަން ހާމަވާ ކަމަށް މީގެ ކުރިން ވެސް ދިފާއުން ކޯޓުގައި ވަނީ ބުނެފަ އެވެ.
އޭނާ ހައްޔަރުކޮށްފައިވަނީ މި މަހުގެ 13 ވަނަ ދުވަހު އެވެ. ކޯޓުން އޭނާގެ ބަންދަށް ފުރަތަމަ ޖެހި ހަތް ދުވަސް ހަމަވުމުން، ބަންދު މުއްދަތު އިތުރު ކުރުމަށް އިއްޔެ ކްރިމިނަލް ކޯޓަށް ހާޒިރުކުރުމުން ބަންދަށް އިތުރު 15 ދުވަސް ވަނީ ޖަހައިފަ އެވެ.
ފުލުހުން އިއްޔެ ކޯޓުގައި ބުނެފައިވާ ގޮތުގައި މަކަރާއި ހީލަތުން ނަގާފައިވާ ގިނަ އަދަދެއްގެ ފައިސާ އެ މީހާގެ އެކައުންޓަށް ޖަމާކޮށްފައިވެ އެވެ. އަދި، ފައިސާ ޖަމާވުމުން އެހެން ބަޔަކަށް އެ މީހާ ފައިސާ ފޮނުވާފައިވާ ކަމަށް ފުލުހުން ބުނެފައިވެ އެވެ.
