ރައީސް މިހެން ވިދާޅުވީ އެމަނިކުފާނު މިހާރު ހއ ކުރައްވަމުން ގެންދަވާ ދަތުރުފުޚުގައި މިއަދު ހަވީރު އުތީމު ރައްޔިތުންނާއި ބައްދަލުކުރައްވާ ވާހަކަ ދައްކަވަމުންނެވެ.
ރައީސް ވިދާޅުވީ ގައުމީ ދުވަސް މި ސަރުކާރުގައި ފާހަގަކުރާނީ ކުރީގެ ސަރުކާރުތަކުން ކުރަމުން އައި ގޮތާއި ތަފާތުކޮށް ކަމަށެވެ.
މީގެ ކުރިން ގައުމީ ދުވަސްތައް ފާހަގަކުރަމުން އަންނަނީ ކޮންމެ ދެ އަހަރަކުން އެއް ފަހަރު އުތީމުގައި އެ ދުވަސް ރަސްމީކޮށް ފާހަގަކުރާ ގޮތަށެވެ.
އުތީމު ރައްޔިތުންނާއި މުހާތަބު ކުރައްވާ ވާހަކަ ދައްކަވަމުން ރައީސް މުއިއްޒު ވިދާޅުވީ އެމަނިކުފާނުގެ ވިސްނުންފުޅަކީ ގައުމީ ދުވަސް އާދައިގެ ގޮތަކަށް ފާހަގަކުރުމުގެ ބަދަލުގައި ގައުމީ ފެންވަރުގައި މަޝްރޫއެއްގެ ގޮތުގައި އެ ދުވަސް ފާހަގަ ކުރުން ކަމަށެވެ.
ރައީސް ވިދާޅުވީ އެމަނިކުފާނު ގަސްތުކުރައްވަނީ މުހިންމު މަޝްރޫއެއްގެ ގޮތުގައި އެކަން ކުރިއަށް ގެންދަވަންކަމަށެވެ. އެގޮތުން ތަކުރުފާނުގެ ގަނޑުވަރާއި އަދި މި ރަށުގަ ހުރި މުހިންމު ތަންތަނާއި ތާރީހީ ގޮތުން ހިމާޔަތްކޮށް ބަލަހައްޓަން ޖެހޭނެ ތަންތަން ބެލެހެއްޓޭ ގޮތަށް އެކަން ކުަރައްވަންކަމަށެވެ.
އުތީމު ގަނޑުވަރު ކުރިމަތީ ރައީސް މުއިއްޒު މަޑުކޮށްލައްވައިގެން
ރައީސް ވިދާޅުވީ ގައުމީ ދުވަސް އުތީމުގައި މިހާތަނަށް ސަރުކާރުން ނުދޭ ސަމާލުކަމެއް ދީގެންކަމަށެވެ. އެ ގޮތުން އެއީ ބަޖެޓުން ހަރަދު ހިންގާ ގޮތަށް ކުރަން ޖެހުނު ކަމެއް ވިޔަސް އެކަން ކުރައްވާނެކަމަށް ރައީސް ވިދާޅުވިއެވެ.
ރައީސް ޑރ. މުއިއްޒު ވިދާޅުވީ އެމަނިކުފާނުގެ މި ސަރުކާރުގެ ތަރައްގީގެ ދުވެލީގައި ވަރަށް މުހިންމު ދައުރެއް ވަރަށް ފުރިހަމަ ގޮތެއްގައި އަދާކުރާނެ ރަށަކަށް އުތީމު ވާނެކަމަށެވެ. އަދި އެއީ އެހެން ރަށްތަކާއި ތަފާތުކުރުން ނޫންކަންވެސް އެމަނިކުފާނު ފާހަގަކުރެއްވިއެވެ.
