ގެއްލިގެން ހޯދަމުން އަންނަނީ އުމުރުން 30 އަހަރުގެ ސޫ ޒިއޯނިން ނަމަކަށް ކިޔާ މީހެކެވެ. ފުލުހުން ބުނީ އޭނާ ރާއްޖެ އައީ މިދިޔަ އަހަރުގެ އޮކްޓޯބަރު 13 ވަނަ ދުވަހު ޓޫރިސްޓު ވިސާގައެވެ. އަދި މާލޭގައި ހުރި ގެސްޓުހައުސްއަކުން އޮކްޓޯބަރު 24 ވަނަ ދުވަހުގެ ހެނދުނު ޗެކްއައުޓް ވެފައިވާ ކަމަށް ފުލުހުން ބުނެއެވެ.
މި މީހާ ގެއްލިގެން ހޯދަން ފެށީ އޭނާގެ މީހާ އާއިލާއާ ގުޅިފައި ނުވާތާ ގިނަ ދުވަސްތަކެއްވުމުން އެ އާއިލާއިން މައްސަލަ ހުށައެޅުމުންނެވެ. އައިލާއިން މައްސަލަ ދިވެހި ފުލުހުންނަށް ހުށައަޅާފައިވަނީ ރާއްޖޭގައި ހުންނަ ޗައިނާ އެމްބަސީ މެދުވެރިކޮށެވެ.
ފުލުހުން ބުނީ މި އަންހެން މީހާ ހޯދުމުގެ މަސައްކަތް އަދިވެސް ކުރަމުން އަންނަކަމަށެވެ. އެހެންނަމަވެސް އެމީހާއާ ބެހޭ އެއްވެސް މައުލޫމާތެއް މިހާތަނަށް ލިބިފައި ނުވާކަމަށް ފުލުހުން ބުނެއެވެ.
ފުލުހުންގެ ތަހުގީގަށް މިހާތަނަށް އެނގިފައިވާ ގޮތުގައި ސޫ ޒިއޯނިން ރާއްޖެއިން ފުރައިގެން ގޮސްފައެއް ނުވެ އެވެ. އަދި އޭނާ އުޅޭ ތަނެއް ނުވަތަ އޭނާއާ ބެހޭ އިތުރު މައުލޫމާތެއް ވެސް މިހާތަނަށް ލިބިފައެއް ނުވެ އެވެ.
ފުލުހުން ވަނީ ސޫ ޒިއޯނިންއާ ބެހޭ މައުލޫމާތެއް އެނގޭ ފަރާތެއް ވާނަމަ، ސީރިއަސް އެންޑް އޮގަނައިޒްޑް ކްރައިމް އިންވެސްޓިގޭޝަންގެ ނަންބަރު 9911099 އަށް ގުޅައި އެ މައުލޫމާތު ހިއްސާކުރުމަށް އެދިފައެވެ.
