މި އެއްބަސްވުމުގައި ސޮއިކޮށްފައިވަނީ ރައީސް ޑރ. މުއިއްޒު ހއ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން އިހަވަންދޫ ރައްޔިތުންނާ ބަދަލުކުރެއްވުމަށް ބޭއްވި ރަސްމިއްޔާތުގައެވެ.
އިހަވަންދޫ ކައުންސިލްގެ ފަރާތުން މި އެއްބަސްވުމުގައި ސޮއިކުރީ އެ ރަށު ކައުންސިލް ރައީސް އަހުމަދު ސޮބާހުއެވެ. އަދި އެމްއައިބީގެ ފަރާތުން އޭޓީއެމް ގާއިމްކުރުމުގެ އެއްބަސްވުމުގައި ސޮއިކުރީ އެ ބޭންކުގެ ހެޑް އޮފް ޑިސްޓްރިބިއުޝަން އިބްރާހީމް ޝުހެއިލްއެވެ.
މި އަހަރުގެ ނިޔަލަށް ރާއްޖޭގައި މީހުން ދިރިއުޅޭ ހުރިހާ ރަށެއްގައި އޭޓީއެމް ބެހެއްޓުމުގެ މަޝްރޫއެއް ސަރުކާރުން ވަނީ ފަށާފައެވެ. މި މަޝްރޫއުގެ ދަށުން ބައެއް ރަށްރަށުގައި ބޭންކް އޮފް މޯލްޑިވްސްގެ އޭޓީއެމް ބަހައްޓާއިރު އަބެއް ބައި ރަށްރަށުގައި އިސްލާމިކް ބޭންކުގެ އޭޓީއެމް ބެހެއްޓުމަށް ވަނީ ހަމަޖެހިފައެވެ.
މި އަހަރުގެ ނިޔަލަށް ރާއްޖޭގައި މީހުން ދިރިއުޅޭ 19 ރަށެއްގައި އެމްއައިބީގެ އޭޓީއެމް ބަހައްޓާނެއެވެ.އަދި މި އަހަރު ނިމޭއިރު 37 ރަށެއްގައި އެމްއައިބީގެ އޭޓިއެމް ހުންނާނެއެވެ. އެއީ ޖުމްލަ 62 އޭޓީއެމްއެވެ. އޭގެތެރޭގައި ހިމެނެނީ ރުފިޔާ ނެގޭ 56 އޭޓީއެމާއި ޑޮލަރު ނެގޭ ހަ އޭޓީއެމްއެވެ.
