ކަސްޓަމްސް އިން ފުރަތަމަ ނިންމީ އެ ކުންފުނީ ނަން ހާމަ ނުކުރާށެވެ. ސަބަބަކަށް ބުނީ އެ މައްސަލަ ތަހުގީގުކުރަމުންދާކަމަށެވެ.
އެހެންނަމަވެސް ކަސްޓަމްސް ނިންމުން ބަދަލުކޮށް ރޭ އެކްސްގައި ކުރި ޕޯސްޓެއްގައި ބުނީ މިދިޔަ އަހަރުގެ ނޮވެމްބަރު މަހުގެ ހަތްވަނަދުވަހު އެ އިދާރާއިން ބަލާފާސްކުރި މުދާ ޝިޕްމެންޓެއްގެ ތެރެއިން މިޔަރު މަހާއި މަޑި މަސް ހުރި 45 ފޮށިގަނޑު ފެނިފައިވާކަމަށެވެ. އަދި މިތަކެތީގެ ބަރުދަނުގައި ޖުމުލަ 582 ކިލޯ ހުރިކަމަށާއި އެ މައްސަލައެއް ތަހުގީގުކުރަމުން އަންނަކަމަށެވެ.
ކަސްޓަމްސްއިން ބުނީ މިތަކެތި ރާއްޖެއިން ބޭރުކުރަން މަސައްކަތްކޮށްފައިވަނީ "ދަ ކްރިސްޓަލް ކޮންޕެނީ ޕްރައިވެޓް ލިމިޓެޑް" ނަމަކަށް ކިޔާ ކުންފުންޏަކުންކަމަށެވެ. އަދި މިކަމާ ގުޅިގެން ކަސްޓަމްސްއާއި ކަމާބެހޭ އެހެން އިދާރާތަކުން ބަލަންޖެހޭ ބެލުންތައް ބެލުމަށްފަހު، ފުރިހަމަ ކުރަންޖެހޭ އިޖުރާއަތުތައް ފުރިހަމަކުރުމަށްފަހު މިދޔަ ޑިސެމްބަރުމަހުގެ ތެރޭ އެ ތަކެތި ވަނީ ނައްތާލާފައިވާކަމަށްވެސް ކަސްޓަމްސް އިން ބުނެއެވެ.
އިކޮނޮމިކް މިނިސްޓްރީގެ ބިޒްނަސް ޕޯޓަލުގައި ވާ ގޮތުން "ދަ ކްރިސްޓަލް ކޮންޕެނީ ޕްރައިވެޓް ލިމިޓެޑް" ދިވެހި ކުންފުންޏެކެވެ. ކުންފުނީގެ ހިއްސާދާރުންގެ ގޮތުގައި ތިބީ މަޝްހޫރު ދިވެހި ފިލްމީ ޑައިރެކްޓާ ފާތިމަތު ނަހުލާ އާއި އޭނާގެ ފިރިމީހާ ހުސައިން ސިނާނެވެ.
ނެތިދިއުމުގެ ބިރުހީވެފައިވާ ދިރޭތަކެތީގެ ބައިނަލްއަގްވާމީ ވިޔަފާރި ކޮންޓްރޯލް ކުރުމުގެ ގާނޫނުގެ ދަށުން، މިޔަރަކީ ރާއްޖެއިން ބޭރުކުރުން މަނާތަކެތީގެ ތެރޭގައި ހިމެނޭ އެއްޗެކެެވެ.
