ތިނަދޫގައި އެޅި 200 ހައުސިން ޔުނިޓަށް ކުރިމަތިލާން ތިނަދޫ ސިޓީ ކައުންސިލުން ހުޅުވާލީ މިދިޔަ ބުދަ ދުވަހުއެވެ.
ހައުސިން މިނިސްޓްރީން މިއަދު ނެރުނު ބަޔާނެއްގައި ވަނީ ހައުސިން ޔުނިޓު އިމާރާތްކުރުމާއި އެތަންތަން އެކި ފަރާތްތަކަށް ދޫކުރުމުގެ މަސައްކަތް ކުރުމާއި ވިލަރެސްކުރުމުގެ މަސައްކަތަކީ އެ މިނިސްޓްރީގެ މެންޑޭޓޫގައި ވާކަމެއްކަމަށެވެ.
ރާއްޖޭގެ އެކި ސަރަހައްދުތަކުގައި އިމާރާތްކުރެވޭ ހައުސިން ޔުނިޓުތައް ހަވާލުކުރެވޭނީ މިނިސްޓްރީން އެންޑޯސްކޮށް ހުއްދަދޭ އުސޫލުތަކާ އެއްގޮތަށް ކަން މިނިސްޓްރީގެ ބަޔާނުގައިވެއެވެ.
މިނިސްޓްރީން ވަނީ ތިނަދޫ ސިޓީ ކައުންސިލުން ކޮށްފައިވާ އިއުލާނަކީ މިނިސްޓްރީގެ ހުއްދައެއްނެތި ކޮށްފައިވާ އިއުލާނަކަށް ވުމުން އެ އިއުލާނު ބާތިލުކުރުމަށް އެރަށުގެ ކައުންސިލަށް އަންގާފައެވެ.
އަދި ހައުސިން ޔުނިޓުތައް ދޫކުރާ އުސޫލު އެންޑޯސްކުރުމަށް މިނިސްޓްރީއަށް ފޮނުވުމަށްވެސް ކައުންސިލަށް ވަނީ އަންގާފައެވެ. މީގެއިތުރުނ 200 ހައުސިން ޔުނިޓުތައް ހަވާލުކުރުމާ ގުޅޭ މަސައްކަތް މިނިސްޓްރީގެ އިރުޝާދުގެ ދަށުން ކުރުމަށްވެސް ތިނަދޫ ކައުންސިލަށް ހައުސިން މިނިސްޓްރީން ވަނީ އަންގާފައެވެ.
