މިހެން ވިދާޅުވީ ދިވެހިރާއްޖޭގެ ގައުމީ ޔުނިވަރސިޓީއާއި އިސްލާމިކް އޯގަނައިޒޭޝަން ފޮރ ފުޑް ސެކިއުރިޓީ ގުޅިގެން ބޭއްވި ކޮންފަރެންސްގައި ވާހަކަފުޅު ދައްކަވަމުންނެވެ. އެކަމަނާ ވިދާޅުވީ ކޯވިޑް-19 ގެ ބަލިމަޑުކަމުގެ ތެރޭގައި ކާބޯތަކެތި ސަޕްލައި ކުރުމުގައި ދިމާވި ދަތިތަކުން ރާއްޖޭގައި ދަނޑުވެރިކަން ކުރުމުގެ މުހިންމުކަން ވަރަށް ބޮޑަށް ފާހަގަވެގެން ދިޔަ ކަމަށެވެ.
ފަސްޓް ލޭޑީ އިތުރަށް ވިދާޅުވީ މޫސުމަށް އަންނަ ބަދަލުތަކާއި ގުދުރަތީ ކާރިސާތަކަށް ވިލުންތެރި ގޮތެއްގައި ދަނޑުވެރިކަން ކުރިއަށް ގެންދިއުމަކީ މުހިންމު ކަމެއް ކަމަށެވެ. މީގެ އިތުރުން ދަނޑުވެރިންނަށް މާކެޓު ހޯދައިދިނުމުގެ މުހިންމުކަންވެސް އެކަމަނާ ފާހަގަކުރެއްވިއެވެ.
ދަނޑުވެރިކަން ކުރިއެރުވުމަށް އޭޝިއަން ޑިވެލޮޕްމަންޓް ބޭންކުން 21.95 މިލިއަން ޑޮލަރުގެ އެހީއެއް ރާއްޖެއަށް ދީފައިވާ ކަމަށް އެކަމަނާ ވިދާޅުވިއެވެ. މި އެހީގެ ދަށުން ކްލައިމެޓް ސްމާޓް އަރބަން ފާމިންގގެ ވަސީލަތްތައް ރާއްޖެއަށް ތައާރަފުކޮށް، ހއ. އަތޮޅާއި އައްޑޫ ސިޓީގެ ރައްޔިތުންނަށް އެކަން ދަސްކޮށްދިނުމަށް ހަމަޖެހިފައިވާ ކަމަށްވެސް އެކަމަނާ ވިދާޅުވިއެވެ.
