އެމަނިކުފާނު މިހެން ވިދާޅުވީ މިއަހަރަށް ރައްޔިތުން މަޖލިސް ހުޅުވާދެއްވަމުން އިއްވެވި ރިޔާސީ ބަޔާނުގައެވެ.
ރައީސް ޑރ މުއިއްޒު ވިދާޅުވީ ކައުންސިލްތަކުގެ މަސްއޫލިއްތާ އެކަށޭނަ ހައިބަތު ވަޒީފާ އަދާކުރާ ވެށްޓާ އިމާރާތުން ވެސް ސޫރަވެ، މަސައްކަތުގެ އެކަށޭނަ ޒަމާނީ ހިތްފަސޭހަ ވެށްޓެއް ގާއިމުކޮށްދީ، ކައުންސިލްތަކަށް ދޭން ޖެހޭ ފުރިހަމަ އިހްތިރާމާއި ގަދަރުދީ އެ އަހްލާގު އުފެއްދުމަކީ އެމަނިކިފާނު ގަބޫލުކުރައްވާ އުސޫލުކަށެވެ. އެގޮތުން ކައުންސިލް އިމާރާތައް އަޅަން ފެއްޓެވީ އެ ސަބަބަށްޓަކައިކަމަށް ރައީސް ވިދާޅުވިއެވެ. މިއާއި އެކު ކައުންސިލްތަކުގައި މަސައްކަތް ކުރާ މުވައްޒަފުންގެ މުސާރައަށްވެސް ހެޔޮ ބަދަލު އަންނަޖެހޭކަމަށާއި މި އަހަރު އެކަންވެސް ކުރައްވާނެކަމަށް ރައީސް ޑރ. މުއިއްޒު ވިދާޅުވިއެވެ.
ކައުންސިލްތައް ބާރުވެރިކުރުމަށް އިސްކަމެއްދޭހެން އަންހެނުންގެ ތަރައްޤީއަށް މަސައްކަތްކުރާ ކޮމިޓީތައްވެސް ބާރުވެރިކުރުމަށް އިސްކަމެއް ދެއްވާކަމަށް ރައީސް ވިދާޅުވިއެވެ. އެގޮތުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ރޯދަ އެލަވަންސާއި އެހެނިހެން އިނާޔަޔްތައް ދިނުމަށް ވަޒީފާއާބެހޭ ޤާނޫނާއި ލާމަރުކަޒީ ޤާނޫނަށް ހުށަހަޅަންޖެހޭ އިސްލާޙުތައް މި މަހު ހުށަައަޅުއްވާނެކަމަށްވެސް ރައީސް މުއިއްޒު ވިދާޅުވިއެވެ.
ކައުންސިލްތަކަށް ދިމާވެފައިވާ ދަތިތައް ހައްލުކުރުމަށް ސަރުކާރުން ވަނީ 105 ކައުންސިލް އިމާރާތް ކުރުމަށް ނިންމާފައެވެ. މީގެތެރެއިން 55 ކައުންސިލް އިމާރާތްކުރަން ހަވާލުކޮށްފައިވަނީ މެލޭޝިޔާގެ ކުންފުންޏަކާއި އެވެ. ދެން ހުރި ކައުސިލްތައް އިމާރާތް ކޮށްދިނުމަށް ހަމަޖެހިފައިވަނީ ޗައިނާ ސަރުކާރުގެ އެހީގައެވެ.
ދާދިފަހުން ރައީސް ޑރ. މުއިއްޒު އަތޮޅުތަކަށް ކުރެއްވި ދަތުރުފުޅުގެ ތެރޭގައި މީގެތެރެއިން ބައެއް ކައުންސިލްތަކުގެ އާ އިމާރާތުގެ ބިންގާ ވަނީ އަޅާފައެވެ.
