ރައީސް އެކަން އިއުލާން ކުރެއްވީ މިއަހަރުގެ ފުރަތަމަ ދައުރުގެ މަޖިލިސް ހުޅުވާދެއްވާ ރިޔާސީ ބަޔާން އިއްވަމުންނެވެ.
މިގޮތުން 33 އިންސައްތަ އިއާދަކުރަނިވި ހަކަތައިގެ އަމާޒަށް ވާސިލުވުމަށް ސަރުކާރުން ބުރަ މަސައްކަތްތަކެއް ކުރަމުން އަންނަ ކަމަށް ވިދާޅުވެ ރައީސް ވަނީ އިރުގެ އަލިން 15 މެގަ ވޮޓްގެ ކަރަންޓު އުފައްދާ ނިޒާމު ފާއިތުވެދިޔަ އަހަރު އިތުރުކުރެވިފައިވާކަމަށް ފާހަގަކޮށްފައެވެ.
ރައީސް ޑރ.މުހައްމަދު މުއިއްޒު ވަނީ އިރުގެ އަލިން 100 މެގަވޮޓް އުފައްދާ ނެޝަނަލް ގްރިޑަށް ފޯރުކޮށްދިނުމަށްޓަކައި މާލެ އަތޮޅު ފަޅެއްގައި ފްލޯޓިން ސޯލަ ޕްރޮޖެކްޓެއް ހިންގުމަށް ބޭރުގެ އިންވެސްޓަރަކަށް ސްޕެޝަލް އިކޮނޮމިކް ޒޯން ޑިވެލޮޕްމަންޓް ޕާމިޓް އިޝޫކުރުމަށް މިހާރު ނިންމާފައިވާކަން ފާހަގަކުރައްވާފައެވެ.
ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނުގެ ދަށުން ފްލޯޓިން ސޯލާ ޕެނަލްތަކެއް ގާއިމްކުރުމުގެ ބިޔަ މަޝްރޫއެއް ހިންގަން ހުއްދަ ދޫކުރީ މިދިޔަ އޭޕްރީލް މަހުއެވެ.
ބޯޑް އޮފް އިންވެސްޓްމަންޓްސްއިން ކެނެޑާގެ އަބްރަކްޒަސް ޕަވާ ކޯޕްއަށް ދޫކުރި މި ހުއްދައަކީ އެސްއީޒެޑް ގާނޫނުގެ ދަށުން ދޫކުރި ފުރަތަމަ ހުއްދަ އެވެ.
އިކޮނޮމިކް މިނިސްޓްރީން ބުނީ މި މަޝްރޫއުގެ ދަށުން ގްރޭޓާ މާލޭ ސަރަހައްދަށް ކަރަންޓު ފޯރުކޮށްދޭން 150 މެގަވޮޓުގެ ފްލޯޓިިން ފޮޓޯ ވޮލްޓައިކް (ޕީވީ) ނިޒާމާއި އެއިން ކަރަންޓު ފޯރުކޮށްދޭން ބޭނުންވާ އުމްރާނީ ވަސީލަތްތައް ގާއިމްކުރެވިގެން ދާނެ ކަމުގަ އެވެ. އަދި ބެޓަރީ ސިސްޓަމަކާ އެކީ މި ނިޒާމު މައި ގްރިޑާ ގުޅާލެވޭނެކަމަށް ވެސް މިނިސްޓްރީން މައުލޫމާތުދެ އެވެ.
