
ޝަކީލަކީ އެ އިންސްޓިޓިއުޓަށް 40 އަހަރަށްވުރެ ގިނަ ދުވަހު ހިދުމަތްކޮށްދެއްވި އިސް ވެރިއެކެވެ.
އޭނާ އަކީ 1983 ވަނަ އަހަރު މެރިން ބަޔޮލޮޖިސްޓް ޓްރެއިނީއެއްގެ ގޮތުގައި މަސައްކަތް ފެއްޓެވި ޝަކީލަކީ، ރާއްޖޭގެ މެރިން ސައިންސް ދާއިރާ ކުރިއެރުވުމަށް އަގުހުރި ހިދުމަތްތަކެއް ކޮށްދެއްވި ބޭފުޅެކެވެ. އޭނާ ވަނީ 1984 އިން 1990 އަށް ރަޝިޔާގައި މާސްޓަރސް އިން ބަޔޮލޮޖީ ހާސިލުކުރައްވާފައެވެ.
މެރިން ރިސާޗް އިންސްޓިޓިއުޓްގެ މެރިކަލްޗަރ ޕްރޮގްރާމްގައި އެންމެ އިސްކޮށް ހަރަކާތްތެރިވި ޝަކީލްގެ ބެއްލެވުމުގެ ދަށުން، ގާހަކަ، މޫދުވިނަ، އިތާމުތް، މާގަނޑުމަސް އަދި ފާނަ ވިއްސުމުގެ ތަޖުރިބާތައް ކުރެވުނެވެ. އަދި ފަރުމަސްވެރިކަމުގައި ބާނާ ހާއްސަ ބައެއް ބާވަތްތަކުގެ އާބާދީގެ ހާލަތު ދެނެގަތުމުގެ މަސައްކަތްތަކުގައިވެސް އިސް ދައުރެއް އަދާކުރެއްވިއެވެ.
ޝަކީލްގެ 41 އަހަރުގެ ދިގު ހިދުމަތުގެ ތެރޭގައި، ގިނަ މުވައްޒަފުންތަކެއް މެންޓަރކޮށް، މެރިން ސައިންސްގެ ދާއިރާއަށް ދިވެހިންގެ ޝައުގުވެރިކަން އިތުރުކުރުމަށް ގިނަގުނަ މަސައްކަތްތަކެއް ކުރެއްވިއެވެ. މީގެ ތެރޭގައި އާންމުންނަށް އަމާޒުކޮށްގެން ގިނަ އަދަދެއްގެ އާޓިކަލްތައް ޝާއިއުކުރެއްވުމާއި، ސްކޫލް ކުދިން އަހުލުވެރިކުރުމުގެ ޕްރޮގްރާމްތައް ހިމެނެއެވެ.