ގާސިމްގެ ވިލާ ކޮލެޖުގައި ބޭއްވި ހާއްސަ ރަސްމިއްޔާތެއްގައި މި ފޮތް ނެރެދެއްވީ ނިޝާން އިއްޒުއްދީންގެ އިއްޒަތުގެ ވެރިޔާ އިލްޔާސް އިބްރާހިމެވެ.
ފޮތް ނެރެދެއްވުމުގެ ހަފްލާގައި ވާހަކަ ދައްކަވަމުން ގާސިމް ވިދާޅުވީ އެމަނިކުފާނުގެ ހަޔާތުގެ މައްޗަށް ލިޔުނު ފޮތް ނެރެދެއްވުމުގެ ޝަރަފު އިލްޔާސަށް ދެއްވި ސަބަބަކީ އުފަން ބައްޕަ ނެތް ދުނިޔޭގައި އޭނާގެ ބައްޕައެއްގެ ގޮތުގައި ބައްލަވާ ބޭފުޅަކީ އިލްޔާސަށް ވުމުންކަމަށެވެ.
ގާސިމް މާލެ ފައިބާ ހުންނެވީ އެންދެރިމާގޭގައެވެ. ގާސިމް ވިދާޅުވީ އޭނާގެ ހަޔާތުގައި ލިބިވަޑައިގެންނެވި ހުރިހާ ކާމިޔާބީއެއްގެ އަސްލަކީ ހަޔާތުގެ ކުރީކޮޅު އެންދެރިމާގެއިން ދަސްވި އަހުލާގާއި ސުލޫކާއި މަސައްކަތެރިކަމުގެ ނަމޫނާއިން ކަމަށެވެ. އޭރު މާލެ ފައިބަން އޭރު ހަދަން ޖެހޭ ރަޖިސްޓްރީގައިވެސް ސޮއިކޮށްދެއްވީ އިލްޔާސްކަން ގާސިމް ފާހަގަކުރެއްވިއެވެ.
ގާސިމްގެ ބަޔޯގްރަފީ ނެރުމަށް ބޭއްވި ރަސްމިއްޔާތުގެ ތެރެއިން - ފޮޓޯ / ކިއުޓީމް
ގާސިމްގެ ބަޔޯގްރަފީ ނެރުމަށް ބޭއްވި ރަސްމިއްޔާތައި ދިވެހި ދައުލަތަށް ގިނަ ދުވަހި ހިދުމަތް ކުރެއްވި ހިދުމަތްތެރިން ވަނީ ބައިވެރިވެޑައިގެންފައެވެ. އެގޮތުން ރައީސް މައުމޫންގެ ދައުރުން ފެށިގެން ވަޒީރުކަން ކުރެއްވި ބޭފުޅުންވެސް ބައިވެރިވެޑައިގަތެވެ.
އޭގެއިތުރުން ކުރީގެ ރައީސް ޑރ މުހައްމަދު ވަހީދު ހަސަން މަނިކާއި ކުރީގެ ރައީސް އިބްރާހިމް މުހައްމަދު ސާލިހާއި ރާއްޖޭގައި ނައިބު ރައީސްކަން ކުރައްވާފައިވާ ބޭފުޅުންނާއި ސަރުކާރުގެ އެހާރާއި މިހާރުގެ ބައެއް ވަޒީރުންނާއި ރައްޔިތުން މަޖިލީހުގެ މެމްބަރުކަން ކުރައްވާފައިވާ ބޭފުޅުން ހިމެނެއެވެ. އަދި ގާސިމާއި އެކު ވިޔަފާރިއާ ސިޔާސީ މަސައްކަތުގައި އުޅުއްވި ބޭފުޅުންނާއި ގާސިމްގެ އާއިލީ ބޭފުޅުންވެސް މި ހަފަލްގައި ބައިވެރިއެވެ.
ގާސިމްގެ ބަޔޯގްރަފީ ނެރުމަށް ބޭއްވި ރަސްމިއްޔާތުގެ ތެރެއިން - ފޮޓޯ / ކިއުޓީމް
800 ވުރެ ގިނަ ސޮފްހާ ހިމެނޭ ގާސިމްގެ ބަޔޯގްރަފީ " ގާސިމް އިބްރާހިމް- ލާމަސީލު ދިވެހި ދަރިއެއް " މި ފޮތް ލިޔުއްވާފައި ވަނީ ތަޖުރިބާކާރު ނޫސްވެރިރާ މުހައްމަދު ޖަމީލްއެވެ. މީ ނޫސްވެރިކަމުގައި 34 އަހަރަށް ވުރެ ގިނަދުވަސް ހިދުމަތް ކުރައްވާފައިވާ ޖަމީލުގެ ތިންވަނަ ފޮތެވެ. މީގެކުރިން ޖަމީލް ވަނީ ރާއްޖޭގެ ފުރަތަމަ ރައީސް މުހައްމަދު އަމީން ދީދީގެ ވެރިކަން ނިމި ދޔަ ގޮތުގައި މައްޗަށް 'އޯކިޑް' ގެ ނަމުގައި ފޮތެއް އަދި ކުރީގެ ރައީސް ޑރ. މުހައްމަދު ވަހީދުގެ ބަޔޯގްރަފީ 'އިންސާފު' މި ނަމުގައި ފޮތެއް ނެރުއްވާފައެވެ.
ގާސިމްގެ ބަޔޯގްރަފީ ނެރުމަށް ބޭއްވި ރަސްމިއްޔާތުގެ ތެރެއިން އެމަނިކުފާނުގެ ދަރިކަނބަލުން ސަނާ - ފޮޓޯ / ކިއުޓީމް
ގާސިމްގެ ބަޔޮގްރާފީގެ ހާޑް ކޮޕީއާއި އެކު ރޭ ވަނީ ބަޔޮގްރަފީގެ އޯޑިއޯއާއި ފޮތާއި ބަޔޯގްރަފީގެ އޮންލައިން ވާޝަންވެސް ނެރެފައެވެ.
ގާސިމުގެ ހަޔާތުގެ އެކި ދުވަސްވަރުގެ ފޮޓޯތައް ހިމެނޭ މައުރަޒެއް ވަނީ ހުޅުވައިފައެވެ. އެ މައުރަޒަށް މިއަދު ހެނދުނު 9:00 އިން ރޭގަނޑު 10:30އަށް އާއްމުކޮސް ހުޅުވާލާފައިވާ މި މައުރަޒަށް ޒިޔާރަތްކުރާ މީހުންނަށް ފޮތުގެ ކޮޕީއެއް ހިލޭ ލިބޭނެކަމަށް ވިލާއިން ވަނީ ބުނެފައެވެ.
