މި މަޝްރޫއުގެ ދަށުން މިހާރު އެ ރަށުގެ 228 ގޭބިސީއަށް ފެނުގެ ހިދުމަތް ފޯރުކޮށްދެމުން ގެންދެއެވެ.
އިންޑިއާ އެގްޒިމް ބޭންކުގެ ފައިނޭންސިންގެ ދަށުން އެސްއެމްސީ އިންފްރާސްޓްރަކްޗާ ޕްރައިވެޓް ލިމިޓެޑުން ކުރިއަށް ގެންދިޔަ މި މަޝްރޫއުގެ ދަށުން 40 ޓަނުގެ ދެ އާރްއޯ ޕްލާންޓާއި 60 ޓަނުގެ ވާރޭ ފެން ޕްލާންޓް ގާއިމުކޮށްފައިވެއެވެ. މީގެ އިތުރުން 305 ޓަނުގެ ބޯފެން ރައްކާކުރާ ދެ ޓޭންކާއި 400 ޓަނުގެ ވާރޭ ފެން ރައްކާކުރާ ޓޭންކެއްވެސް ވަނީ ބަހައްޓާފައެވެ.
އިމާރާތްކުރުމާއި ގެދޮރުވެރިކަމާ ބެހޭ މިނިސްޓްރީން ބުނީ މަޝްރޫއުގެ މަސައްކަތްތައް ނިމި، މިހާރު ވަނީ ޑިފެކްޓްސް ލައަބިލިޓީ ޕީރިއަޑްގެ ދަށުން ހިދުމަތް ފޯރުކޮށްދޭން ފަށާފައި ކަމަށެވެ. އަދި މި މަޝްރޫއަކީ ސަރުކާރުން ރާއްޖޭގެ ރަށްރަށުގައި އަސާސީ ހިދުމަތްތައް ފޯރުކޮށްދިނުމަށް ކުރިއަށްގެންދާ މަސައްކަތްތަކުގެ ތެރެއިން އެއް މަޝްރޫއު ކަމަށްވެސް އެ މިނިސްޓްރީން ބުންޏެވެ.
މި މަޝްރޫއު ނިމުމާއެކު، ކަލައިދޫގެ ރައްޔިތުންނަށް ސާފު ބޯފެން ލިބި، ދިރިއުޅުމުގެ ފެންވަރު ރަނގަޅުވެގެންދާނެ ކަމަށް ބެލެވެއެވެ.
