
އާޒިމް މިހެން ވިދާޅުވެފައި މިވަނީ ރަސްފަންނާއި ސަލްޓަންޕާކް ގެ ހާލަތު ފެނިފައި ހިތާމަކުރައްވާކަމަށާއި އެތަންތަން ކުރިޔަށްވުރެވެސް ފުރިހަމަކޮށްދެއްވާނެކަމަށް ރައީސް ޑރ މުހައްމަދު މުއިިއްޒު މިއަދު ވިދާޅުވެފަި ވަނިކޮށެވެ.
މޭޔަރު އާދަމް އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ މާލޭ ސިޓީ ކައުންސިލުން ވަނީ ސަލްޓަން ޕާކުގެ ހާލަތު ދެނެގަތުމަށް ހާއްސަ ދިރާސާއެއް ހެދުމަށްފަހު، އެތަން އާބާތުރަ ފިލުވައިދޭނެ ފަރާތެއް ހޯދުމަށް އާންމުކޮށް އިޢުލާނުކޮށްފައިވާކަމަށެވެ.
މޭޔަރު ވިދާޅުވީ 2016 ވަނަ އަހަރު ހުޅުވި ސަލްޓަން ޕާކް އޭގެފަހުން އެއްވެސް މަރާމާތެއް ނުކުރެވި، އެތަނުގައި ހުރި އިމާރާތްތަކާއި ވަސީލަތްތައް ބޭނުން ނުކުރެވޭ ހާލަތަކަށް ގޮސްފައިވާ ތަންތަންކަން އެތަން ބޭނުންކުރާ ފަރާތްތަކަށް ރަނގަޅަށް އެނގޭނެކަމަށެވެ. އެހެންކަމުން އެތަން މަރާމާތުކުރުމުގެ މަސައްކަތް ކުރަމުން އަންނަކަން އާޒިމް ފާހަގަކުރެއްވިއެވެ.
މޭޔަރު ވިދާޅުވީ ރަސްފަންނުގެ ވެލިގަނޑުގެ ރަނގަޅުކުރުމަށް ބޭނުންވާ ތިމާވެށީގެ ހުއްދަ އީޕީއޭއިން ވަނީ މިހާރު ލިބިފައިވާކަމަށެވެ.
ރައީސް ޑރ މުއިއްޒު މިއަދު ރަސްފަންނަށް ކުރެއްވި ޒިޔާރަތަށް ފަހު އެކްސްގައި ކުރެއްވި ޕޯސްޓެއްގައި އެމަނިކުފާނު ވިދާޅުވީ ރަސްފަންނާއި ސަލްޓަންޕާކް ގެ ހާލަތު ފެނިފައި ހިތާމަކުރައްވާކަމަށެވެ. ދެ ތަންވެސް ދަނީ ވީރާނާވަމުންކަން ފާހަގަކުރައްވާ މި ދެތަނަކީވެސް ތޮށްޖެހިފައިވާ މާލޭގައި، ރައްޔިތުންނަށް ނުހަނު ހިތްހަމަޖެހުމާއި އުފާ ލިއްބައިދޭ ދެތަންކަން ްެއެމަނިކުފާނު ވިދާޅުވިއެވެ.
ރައީސް ޑރ. މުއިއްޒު ވިދާޅުވީ މި ދެތަންވެސް މަރާމާތުކޮށް ކުރިޔަށް ވުރެ ފުރިހަމަކޮށް ހައްދަވާދެއްވާނެކަމަށެވެ