
މި ދިރާސާއަކީ ކުޑަކުދިން ކުށަށް އަރައިގަންނަން މެދުވެރިވާ ސަބަބުތައް ދެނެގަތުމަށް ކުރާ ދިރާސާއެކެވެ.
ޑިޕާޓްމަންޓުން މިއަދު ހާމަކުރި ގޮތުގައި މި ދިރާސާގެ މަސައްކަތް ކުރިއަށް ގެންދާނީ އިސްލާމިކް ޔުނިވަރސިޓީ އޮފް މޯލްޑިވްސްއާ ގުޅިގެންނެވެ. މިހާރު ވަނީ ދިރާސާގެ ޕްރޮޕޯސަލްގެ މަސައްކަތް ނިމި، ފަންޑިންގ ހޯދުމުގެ މަސައްކަތް ފެށިފައެވެ.
ޑިޕާޓްމަންޓުން ބުނީ މިއަހަރުގެ ތެރޭގައި ދިރާސާގެ މަސައްކަތް ނިންމައި ނަތީޖާ ހާމަކުރެވޭނެ ކަމަށެވެ. އަދި މިފަދަ ދިރާސާއެއް މީގެ ކުރިން ރަސްމީކޮށް ކުރެވިފައި ނުވެއެވެ.
ކުޑަކުދިން ކުށަށް އަރައިގަތުން އިތުރުވަމުންދާއިރު، ގިނަ ފަހަރަށް މަސްތުވާތަކެތީގެ ވިޔަފާރީގައި 18 އަހަރުން ދަށުގެ ކުދިން ބޭނުންކުރާކަން ވަނީ ފާހަގަކުރެވިފައެވެ. މި ދިރާސާއިން މިފަދަ ކަންކަމަށް ކުދިން ހުށަހެޅޭ ސަބަބުތައް ދެނެގަނެ، އެކަން ހުއްޓުވުމަށް އަޅަންޖެހޭ ފިޔަވަޅުތައް ދެނެގަނެވޭނެއެވެ.