ހެލްތް މިނިސްޓްރީން މި މަހުގެ 12 ވަނަ ދުވަހު ގެޒެޓް ކުރި މި ގަވާއިދުގެ ދަށުން، އެއް ފަހަރަށްވުރެ ގިނަ ފަހަރު ގަވާއިދާ ހިލާފުވާ މީހުން 3000 ރުފިޔާއިން ޖޫރިމަނާ ކުރެވޭނެއެވެ. ފުރަތަމަ ފަހަރު ގަވާއިދާ ހިލާފުވާ މީހުން 1000 ރުފިޔާއިން ޖޫރިމަނާ ކުރެވޭއިރު، ދެވަނަ ފަހަރު 2000 ރުފިޔާއިން ޖޫރިމަނާ ކުރެވޭނެއެވެ.
މި ގަވާއިދުގެ ދަށުން މިސްކިތްތަކާއި ސްކޫލްތަކުގެ 25 ފޫޓުގެ ސަރަހައްދުގައި ދުންފަތުގެ އިސްތިއުމާލު ކުރުން މަނާކޮށްފައިވެއެވެ. މީގެ އިތުރުން ހޮސްޕިޓަލްތަކާއި ބޭސްފިހާރަތަކުގެ ކުރިމަތީގައާއި ސަރުކާރު އޮފީސްތަކުގައިވެސް ސިނގިރެޓް ބުއިން މަނާކޮށްފައިވެއެވެ.
ކުޑަކުދިންގެ ޕާކުތަކާއި، މައިޒާންތަކާއި، ޒުވާނުންގެ މަރުކަޒުތަކާއި، ކުޅިވަރު ކުޅޭ ސަރަހައްދުތަކުގައިވެސް ދުންފަތުގެ އިސްތިއުމާލު ކުރުން މަނާކޮށްފައިވާކަން ގަވާއިދުގައި ބަޔާންކޮށްފައިވެއެވެ. އަދި ގިނަ މީހުން ދިރިއުޅޭ ސަރަހައްދުތަކުގެ ގޯޅިތަކުގައި ވެސް ސިނގިރެޓް ބުއިން މަނާކޮށްފައިވެއެވެ.
