ބޭންކް އޮފް މޯލްޑިވްސްއިން، މާސްޓާކާޑާ ގުޅިގެން ބޭއްވި 2025 ވަނަ އަހަރުގެ ކޮލޮމްބޯ ފެޝަން ވީކް ޕްރޮމޯޝަނުގެ ބޮޑު އިނާމު އިބްރާހީމް ސަލީމްއަށް ލިބިފައިވާކަމަށް އެކުންފުނިން ބުނެފިއެވެ.
ބީއެމްއެލްއިން ބުނީ ސަލީމާއި އޭނާއާ އެކު އެދަތުރުގައި ބައިވެރިވާ ފަރާތަކަށް ފެބުރުވަރީ 19 އިން 22 އަށް ސްރީލަންކާއަށް މި ޝޯ ބަލާލުމަށް ދިޔުމުގެ ފުރުސަތު ލިބިގެންދާނެކަމަށެވެ. އެގޮތުން އިނާމުގެ ގޮތުގައި ބިޒްނަސް ކްލާސް ދެކޮޅު ޓިކެޓާއި، 5 ތަރީގެ ހޮޓަލެއްގައި ހުރުމާއި، އަދި އިވެންޓަށް ވީވީއައިޕީ ޓިކެޓް ހިމެނޭ ކަމަށް ބީއެމްއެލްއިން ފާހަގަކުރެއެވެ.
އޭގެއިތުރުން ތަފާތު ކަލިނަރީ ތަޖުރިބާތައްކޮށްލުމުގެ ފުރުސަތުވެސް ލިބޭނެކަމަށްވެސް ބީއެމްއެލްއިން މައުލޫމާތުދެއެވެ.
މި ޕްރޮމޯޝަން ހުޅުވާލެވުނީ ހަމައެކަނި ބީއެމްއެލްގެ މާސްޓަކާޑު ޑެބިޓް އަދި ކްރެޑިޓް ކާޑު ބޭނުންކުރާ ކަސްޓަމަރުންނަށެވެ. މިއީ ބޭންކުން ކަސްޓަމަރުންނަށް ތަފާތު ތަޖުރިބާތައް ފޯރުކޮށްދިނުމަށް ކުރަމުންދާ މަސައްކަތުގެ ދަށުން ހިންގުނު ޕްރޮމޯޝަނެއް ކަަމަށް ބީއެމްއެލްއިން ބުނެއެވެ.
